काठमाडौँ, चैत २१ गते । उपराष्ट्रपति रामसहायप्रसाद यादवसँग नेपालस्थित बङ्गलादेशी दूतावासका कार्यवाहक राजदूत मोहम्मद हुमायूँ कबीरले शिष्टाचार भेटर्वार्ता गर्नुभएको छ ।
लैनचारस्थित उपराष्ट्रपतिको कार्यालयमा बिहीबार भएको भेटमा दुई मुलुक बिचको द्विपक्षीय सम्बन्धका विविध आयामहरूका बारे छलफल भयो । उपराष्ट्रपति यादवले नेपाल र बङ्गलादेशबिच सन् १९७१ मा बङ्गलादेश स्वतन्त्र राष्ट्रको रूपमा स्थापना भएदेखि नै मैत्रीपूर्ण र सद्भावपूर्ण सम्बन्ध कायम रहेको बताउनुभयो ।
‘‘दुई देशबिच उच्चस्तरीय भ्रमणहरूको आदान–प्रदान, द्विपक्षीय संयन्त्र र बैठकहरूले द्विपक्षीय सम्बन्धलाई थप सुदृढ बनाउन महत्त्वपूर्ण भूमिका निर्वाह गरेको छ’’ उहाँले भन्नुभयो, ‘‘हाम्रो दुई देशबिचको व्यापार पछिल्ला वर्षहरूमा वृद्धि भएको र थप व्यापार विस्तार र विविधीकरण गर्न सक्नुपर्दछ ।’’
उपराष्ट्रपति यादवले बङ्गलादेशले तेस्रो देशसँगको व्यापारका लागि चिटगाँव र मङ्गला बन्दरगाहमार्फत ट्रान्जिट सुविधा प्रदान गरेकोमा खुसी व्यक्त गर्नुभयो । ‘‘रोहनपुर–सिङ्गाबाद रेलवे मार्गको शीघ्र सञ्चालनले यी समुन्द्री बन्दरगाहहरू मार्फत ट्रान्जिट सहकार्य प्रवर्धन गर्न महत्त्वपूर्ण हुने छ’’ उहाँले भन्नुभयो, ‘‘विमान बङ्गलादेश र हिमालयन एयरलाइन्समार्फत हवाई उडानले पर्यटन प्रवर्धन एवम् नेपाल र बङ्गलादेशबिच जनसम्पर्कलाई सहज बनाएको छ ।’’
उपराष्ट्रपति यादवले नेपालको जलविद्युत् सम्भावना र बङ्गलादेशको ऊर्जा आवश्यकताहरूले दुई देशबिच ऊर्जा सहकार्यलाई विस्तार गर्ने प्रचुर अवसर प्रदान गरेको उल्लेख गर्नुभयो । उहाँले नेपाल विद्युत् प्राधिकरण, बङ्गलादेश डेभलपमेन्ट बोर्ड र भारतको विद्युत् व्यापार निगम लिमिटेडबिच ३ अक्टोबर २०२४ मा काठमाडौंमा त्रिपक्षीय पावर सेल्स एग्रीमेन्ट (पिएसए) मा हस्ताक्षर हुनु प्रशंसनीय कार्य भएको बताउनुभयो ।
‘‘यस ऐतिहासिक सम्झौता नेपाल–बङ्गलादेश सम्बन्धमा कोसेढुङ्गाको रूपमा रहेको छ र यसले दक्षिण एशियामै क्षेत्रीय र उपक्षेत्रीय ऊर्जा सहकार्यलाई प्रवर्धन गर्ने अपेक्षा छ’’ उहाँले भन्नुभयो, ‘‘नेपाल र बङ्गलादेश दुबै देशमा प्राकृतिक सौन्दर्य, समृद्ध सभ्यता र सांस्कृतिक धरोहर, साहसिक खेलकुद र जैविक विविधता झल्काउने प्रशस्त प्रसिद्ध पर्यटकीय गन्तव्यहरू छन । नेपाल बङ्गलादेशका लागि महत्त्वपूर्ण पर्यटक गन्तव्य रहिआएको छ ।’’
पराष्ट्रपति यादवले नेपाल र बङ्गलादेशबिच सांस्कृतिक सम्बन्ध र जनसम्पर्क प्रगाढ रहेको उल्लेख गर्नुभयो । ‘‘नेपाली विद्यार्थीका लागि बङ्गलादेश चिकित्सा, दन्तचिकित्सा र इन्जिनियरिङका क्षेत्रमा उच्च अध्ययनका लागि एक आकर्षक गन्तव्य रही आएको छ’’ उहाँले भन्नुभयो, ‘‘बङ्गलादेश सरकारले वार्षिक रूपमा सोही सङ्कायहरुमा २० भन्दा बढी छात्रवृत्ति प्रदान गरिरहेकोमा नेपाल धन्यवाद दिन चाहन्छ ।’’
उहाँले नेपाल र बङ्गलादेशबिच उपक्षेत्रीय, क्षेत्रीय र अन्तर्राष्ट्रिय मञ्चहरूमा आपसी चासोका विषयहरूमा सहकार्य हुँदै आएकोमा खुसी समेत व्यक्त गर्नुभयो । ‘‘यस्ता सहकार्य भविष्यमा पनि जारी रहनु पर्दछ,’’ उहाँले भन्नुभयो,’ ‘‘नेपालले बङ्गलादेशसँगको सम्बन्धलाई एक मित्र राष्ट्रको रूपमा उच्च महत्त्व दिन्छ । हाम्रो दुई देश र जनता बिचको सम्बन्ध भविष्यमा अझ प्रगाढ हुने विश्वास लिएको छु ।’’
भेटवार्ताका क्रममा उपराष्ट्रपति रामसहायप्रसाद यादवले बङ्गलादेशको राष्ट्रिय दिवसको अवसरमा महामहिम राष्ट्रपति महम्मद शाहबुद्दिन र बङ्गलादेशी जनतालाई न्यानो अभिवादनसहित हार्दिक बधाई तथा शुभकामना समेत व्यक्त गर्नुभयो ।
कार्यवाहक राजदूत मोहम्मद हुमायूँ कबीरले नेपाल र बङ्गलादेशबिचको सम्बन्ध गहिरो रहेको उल्लेख गर्दै दुई देशले पर्यटन विकासमा जोड दिनुपर्ने बताउनुभयो । ‘‘नेपालसँग सगरमाथा छ, बङ्गलादेशसँग ‘सि बिच’ छ, जुन पर्यटनको आकर्षणको केन्द्र बन्न सक्छ,’’ उहाँले भन्नुभयो, ‘‘हरेक वर्ष ४० हजार बङ्गलादेशी नेपाल भ्रमण गर्छन्, यसलाई बढाउन सकिन्छ ।’’
