राजतन्त्र स्थापनाको कुरा हल्ला मात्रै हो : सभापति देउवा

कृतबहादुर विष्ट 
धनगढी (कैलाली), फागुन २६ गते । नेपााली कांग्रेसमा सभापति शेरबहादुर देउवाले राजतन्त्र स्थापनाको कुरा हल्ला मात्र भएको बताउनु भएको छ । सोमबार कांग्रेसको सुदूरपश्चिम प्रदेश सम्मेलनको उद्घाटन गर्न धनगढी पुग्नुभएका सभापति देउवाले सो कुरा बताउनु भएको हो ।

धनगढी विमानस्थलमा सञ्चारकर्मीहरूले काठमाडौंमा राजसंस्था पक्षधरहरूले निकालेको र्‍यालीको विषयमा राखेको जिज्ञासाबारे सभापति देउवाले राजतन्त्रको पक्षमा माहोल सिर्जना हुँदैछ भन्ने हल्लामात्र भएको बताउनु भएको हो ।

उहाँले भन्नुभयो , “राजतन्त्रको विषयमा मलाई थाहा छैन, अनावश्यक हल्ला हो, मलाई के केही थाह छैन ।’’ यस्तै उहाँले नेपालको आन्तरिक राजनीतिमा कुनै बाह्य हस्तक्षेप नभएको समेत स्पष्ट पर्नुभयो । 

यस्तै, सभापति देउवाले सुदूरपश्चिम प्रदेशको समग्र विकासमा आफू क्रियाशिल रहने बताउनुभयो । सम्मेलनमा सहभागी हुन पूर्व उपसभापति गोपालमान श्रेष्ठ, कांग्रेस महामन्त्रीद्वय गगन कुमार थापा र विश्वप्रकाश शर्मा, प्रवक्ता डा. प्रकाशशरण महत, नेता बालकृष्ण खाण, कृष्णप्रसााद, सिटौला, एनपी साउद, डा. शशांक कोइरालालगायतका नेताहरू आज धनगढी आउनुभएको छ ।