घोराही समाचारदाता
घोराही, फागुन १९ गते । लोपोन्मुख कुसुन्डा समुदायले आफ्नो भाषा, कला, संस्कृति र धर्म जोगाउनका लागि एकीकृत बस्तीको माग गरेका छन् । विभिन्न ठाउँमा छरिएर रहँदा भाषासँगै कला, संस्कृति र धर्मसङ्कटमा पर्दै गएको भन्दै संरक्षणका लागि सबैलाई एकै ठाउँमा राख्ने गरी कुसुन्डा समुदायको एकीकृत बस्ती बनाउनुपर्ने माग रहेको छ ।
समुदायमा कुसुन्डा भाषा बोल्ने मानिस नहुँदा सिकेको भाषा पनि बिर्सने अवस्था भएको भन्दै घोराही उपमहानगरपालिका–१४, नयाँ बजार निवासी कमला कुसुन्डाले भाषासँगै कला, संस्कृतिको संरक्षणका लागि देशभर रहेका कुसुन्डा जातिलाई एउटै बस्तीमा राख्नुपर्ने बताउनुभयो । आफ्नै भाषामा कुरा गर्न सक्ने मानिस एकै ठाउँमा भइदिए साँझबिहान बोलचाल गर्दा पनि धेरै कुरा सिक्ने हुने उहाँको भनाइ छ ।
उहाँको जस्तै अनुभव छ, घोराही उपमहानगरपालिका–१४ निवासी शर्मिला कुसुन्डाको पनि । उहाँले पनि दुई वर्षअघि घोराहीमा भाषा आयोगले आयोजना गरेको पहिलो र दोस्रो चरण गरेर कक्षाबाट कुसुन्डा भाषा सिक्नुभयो तर बोलचाल गर्ने मानिस कोही छैनन् । सिकेको कुरा घरमा आमाबुवासँग बोल्ने गरे पनि त्योभन्दा बाहिर कुरा गर्ने मानिस नभएको उहाँले बताउनुभयो ।
कुसुन्डा भाषा पूर्ण रूपमा बोल्न जान्ने सीमित व्यक्ति रहेको तैपनि सँगै बस्ने अवस्था नहुँदा सिक्न चाहने नयाँ पुस्तालाई समेत समस्या भएको उहाँको भनाइ छ । अहिले पूर्ण रूपमा कुसुन्डा बोल्न सक्ने कमला कुसुन्डा मात्र हुनुहुन्छ । उहाँ र दिदी ज्ञानीमाया कुसुन्डलाई मात्र भाषा आउने भए पनि ज्ञानीमाया कुसुन्डाको केही वर्षअघि निधन भएपछि अहिले एक्लै रहनुभएको छ ।
आफ्नो भाषा, संस्कृति हराउँदै गएकोप्रति चिन्ता व्यक्त गर्दै उहाँले आफ्नो समुदायसँगै बस्ने अवस्था बनेमा भाषा, संस्कृति संरक्षणमा सहयोग पुग्ने बताउनुहुन्छ । भाषा आयोगको सहयोगमा तीन÷चार चरणमा दाङमा बालबालिकादेखि गृहिणी महिलाका लागि भाषा सिक्ने व्यवस्था गरेको नेपाल कुसुन्डा विकास समाज केन्द्र दाङका अध्यक्ष धनबहादुर कुसुन्डाले बताउनुभयो ।
