भैरहवा समाचारदाता
भैरहवा, फागुन १९ गते । लुम्बिनी प्रदेशको एक मात्र हिमाली जिल्ला रुकुमपूर्वमा हिमपातका कारण यात्रुलाई आवागमनमा सास्ती भएको छ । कतिपय यात्रु हिमपातमा रमाउँदै यात्रा गरेका छन् भने कतिपयलाई सास्ती खेप्नु परिरहेको छ ।
लामो समयपछि शुक्रबार रातिदेखि बाक्लो हिमपात भएको थियो । हिउँ पर्नेबित्तिकै हिउँ खेल्न सर्वसाधारण झुम्मिन थालेका छन् तर मध्यपहाडी लोकमार्गको लुकुम–पातिहाल्ने खण्ड अवरुद्ध भएपछि यात्रुलाई मर्का परेको छ । रुकुमपश्चिमबाट काठमाडौँका लागि हिँडेका तीन वटा बससँगै अन्य साना गाडीमा सवार यात्रुको उद्धार गरिएको छ ।
हिमपातका कारण बाटो बन्द भएपछि शुक्रबार दिउँसोबाट बस रुकुमपूर्व र बागलुङ सिमाना पार गर्न नसक्दा यात्रु अलपत्र थिए । रुकुमपश्चिमबाट काठमाडौँका लागि छुटेको बस शुक्रबार दिउँसो पातिहाल्नेनजिक पुगे पनि हिउँका कारण अगाडि बढ्न नसक्दा रातभरि र शनिबार दिनभर बसमै बिताएको रुकुमपश्चिमकी प्रेमिका मल्लले बताउनुभयो ।
त्यहाँ नजिकै होटेल नभएको र पातिहाल्नेमा भएको साना दुई होटेलमा बस्न नअटाउने भएपछि ४८ घण्टासम्म खाना नपाएर बिताएको यात्रुहरूले बताएका छन् । शनिबार दिनभरि मध्यपहाडी लोकमार्गमा भएको हिउँ पन्छाएर यात्रुको उद्धार गरिएको रुकुमपूर्वका प्रमुख जिल्ला अधिकारी रुद्रप्रसाद न्यौपानेले जानकारी दिनुभयो ।
रुकुमपूर्वको लुकुम–पातिहाल्ने खण्डको लगभग पाँच किलोमिटर र बागलुङ खण्डको दुई किलोमिटरमा रहेको हिउँ पन्छाएर यात्रुको उद्धार गरिएको उहाँले बताउनुभयो । नेपाल प्रहरी र सशस्त्र प्रहरी बलको सहयोगमा हिउँ पन्छाइएको थियो । हिउँ पन्छाएपछि काठमाडौँका लागि रुकुमबाट छुटेका बस र रुकुमबाट काठमाडौँका लागि छुटेका बसलाई वारपार गराइएको रुकुमपूर्वका प्रहरी निरीक्षक हिमबहादुर केसीले जानकारी दिनुभयो ।
हिउँमा फसेका यात्रुको उद्धारपश्चात् रातिको समयमा उक्त सडक भएर बस नचलाउन भनिएको छ । मध्यपहाडी लोकमार्गको यो खण्डको अवस्था हेरेर मात्र यातायातका साधन सञ्चालन गर्ने वा नगर्ने भनेर जानकारी गराइने प्रमुख जिल्ला अधिकारी न्यौपानेले बताउनुभयो । बाक्लो हिउँ जमेका कारण मैकाटका नागरिकलाई गाउँपालिकाको केन्द्र तकसेरा र सदरमुकाम रुकुमकोट झर्न समस्या भएको त्यहाँका स्थानीयवासीले बताएका छन् ।
