.jpg)
साहारा लिम्बू
फुङ्लिङ, फागुन १८ गते। ताप्लेजुङमा निःशुल्क रुपमा दुई सय ४१ कुकुरलाई रेबिज विरुद्धको खोप लगाइएको छ। भेटनरी अस्पताल तथा पशु सेवा विज्ञ केन्द्र ताप्लेजुङले कुकुरहरूलाई निःशुल्क रेबिजविरुद्धको खोप लगाएको हो।
नेपाल एग्री लाइभस्टक ट्रेनिङ एण्ड रिसर्च सेन्टर इटहरीको प्राविधिक सहयोगमा गत फागुन १६ देखि १८ गते सम्म सञ्चालन भएको तीन दिने निःशुल्क सामुदायिक कुकुर बन्ध्याकरण तथा रेबिजविरुद्धको खोप शिविर मार्फत दुई सय कुकुरको बन्ध्याकरण गरिएको छ।
जसमा १६४ सामुदायिक र ३६ घरपालुवा कुकुर रहेको भेटनरी अस्पताल तथा पशु सेवा विज्ञ केन्द्र ताप्लेजुङका प्रमुख डाक्टर रोशन दाहालले जानकारी दिनुभयो। उहाँका अनुसार प्राविधिकको टोलीले स्थलगत रूपमै गएर सामुदायिक कुकुरको खोजी गरी भेटनरी अस्पताल तथा पशु सेवा विज्ञ केन्द्र ताप्लेजुङ परिसरमा केन्द्रित गरी बन्ध्याकरण तथा रेबिजविरुद्धको खोप लगाइएको हो।
रेबिज एक प्रकारको जनावरको टोकाइबाट सर्ने भाइरसजन्य सङ्क्रमण हो। यदि रेबिज लागेको जनावरले टोकेमा यस विरुद्ध खोप नलगाएमा रेबिज सङ्क्रमण जनावरबाट मानिसमा सर्न सक्छ। यो रोग लागिसकेपछि निको हुन असम्भव रहेको विज्ञको भनाइ छ।
