तिनाउ समाचारदाता
तिनाउ (रुपन्देही), फागुन १८ गते । नेपाली कांग्रेसका नेता शेखर कोइरालाले २०८२ भित्रै पार्टीको १५ औँ महाधिवेशन सम्पन्न गर्नुपर्नेमा जोड दिनुभयो । नेपाली कांग्रेस रुपन्देही क्षेत्र नम्बर २ को आयोजनामा भैरहवामा हुने कार्यक्रममा सहभागी हुन शनिबार भैरहवा आइपुग्नुभएका नेता कोइरालाले गौतम बुद्ध विमानस्थलमा सञ्चारकर्मीसँग कुरा गर्दै २०८२ भित्रै महाधिवेशन गर्नुपर्नेमा जोड दिनुभएको हो ।
नेता कोइरालाले महाधिवेशनपूर्व गर्नुपर्ने सदस्यता नवीकरण, नयाँ क्रियाशील सदस्यता वितरणलगायतका काममा भएको ढिलाइ प्रति चिन्ता व्यक्त गर्नुभयो । नेता कोइरालाले २०८२ भित्र पार्टीको महाधिवेशन सकेर ८४ को आम निर्वाचनमा एकताबद्ध भएर नेपाली कांग्रेसलाई विजयी बनाउने गरी अगाडि बढ्नपर्ने बताउनुभयो । १५ औँ महाधिवेशनका लागि आफू पार्टी सभापतिको उम्मेदवार रहेको बताउँदै त्यही अनुरूप अगाडि बढेको बताउनुभयो ।
उहाँले एक फरक प्रसङ्गमा सरकारले जनअपेक्षा अनुसार काम गर्न नसकेको बताउनुभएको छ । वर्तमान सरकारलाई असफल हुने छुट पनि नभएको भन्दै एमालेसँग सहकार्य गरेर काम गर्नुपर्ने बताउनुभयो । सो अवसरमा पार्टीका नेता तथा कार्यकर्ताले तोकिएको समयभित्रै १५ औँ महाधिवेशन सम्पन्न गर्न दबाबस्वरूप १५ किलोको मालासमेत लगाइदिएका थिए ।
