तानसेन समाचारदाता
तानसेन, फागुन १८ गते । नेकपा (एमाले) का वरिष्ठ उपाध्यक्ष ईश्वर पोखरेलले वर्तमान सरकार २०८४ सालसम्मै रहने बताउनुभएको छ । नेकपा (एमाले) पाल्पाले शुक्रबार तानसेनमा आयोजना गरेको कार्यकर्ता अभिमुखीकरण कार्यक्रममा उपाध्यक्ष पोखरेलले कांग्रेस–एमालेबिचको सहमतिमा बनेको सरकार आगामी चुनावसम्मै रहने दाबी गर्नुभयो ।
प्रतिपक्षलगायतका केही दलले सरकार आजै ढल्छ, भोलि नै ढल्छ भनेर कुप्रचार गरे पनि सरकार कसैको चाहनाले नढल्ने बताउँदै उहाँले हरेक निर्वाचनमा मुख्य प्रतिस्पर्धी दल नेपाली कांग्रेस भए पनि ऐतिहासिक परिवर्तन जोगाउन र मुलुकलाई सङ्कटबाट बचाउन एमाले–कांग्रेसबिच सहकार्य आवश्यक रहेको बताउनुभयो ।
उहाँले कांग्रेस र कम्युनिस्टका बिचमा २००७ सालमा प्रजातन्त्र ल्याउन, २०३६ सालको जनमत सङ्ग्रह, २०४६ सालको बहुदल ल्याउन, २०६२/६३ को जनआन्दोलन र २०७२ सालमा नयाँ संविधान घोषणा गर्न सहकार्य भएकाले ऐतिहासिक उपलब्धि हासिल गर्न दुई दलबिच सहकार्य आवश्यक रहेको उहाँले बताउनुभयो । आगामी २०८४ को तीन वटै आमनिर्वाचनमा एमालेको प्रतिस्पर्धा कांग्रेससँगै हुने भए पनि विगतका उपलब्धि जोगाउँदै मुलुकलाई अस्थिरताबाट बचाउन दुई दलबिच सत्ता सहकार्य भएको नेता पोखरेलको भनाइ छ ।
उहाँले नेकपा (एमाले) लाई अब्बल र सशक्त पार्टी बनाउन युवापुस्तालाई पार्टीमा ल्याउनुपर्नेमा जोड दिनुभयो । पुराना र नयाँ पुस्ता बराबर हुने गरी पार्टीलाई अगाडि बढाउनुपर्नेमा उहाँले जोड दिनुभयो । उहाँले अब पार्टीभित्र कुनै पनि भ्रष्टाचारी नटिक्ने बताउँदै पार्टीभित्र रहेका त्यस्ता मान्छे बिस्तारै आफैँ पाखा लाग्ने उल्लेख गर्नुभयो । कार्यक्रममा एमालेका पोलिटव्युरो सदस्य ठाकुरप्रसाद गैरेले वडास्तरीय कार्यक्रमले पार्टीलाई चुस्तदुरुस्त, फुर्तिलो, जनतामैत्री बनाउने जिकिर गर्नुभयो । २०८१ चैत मसान्तभित्र साबिकका गाविसहरूका सबै वडाहरूमा एमालेको अभियान पुग्ने र जनताका घर घरमा एमाले पुग्ने उहाँले बताउनुभयो । यस्तै नेकपा (एमाले) लुम्बिनी प्रदेश कमिटिका अध्यक्ष राधाकृष्ण कँडेलले पार्टीमा पद अनुसारको जिम्मेवारी पूरा नगर्ने पदाधिकारीको आगामी दिनमा मूल्याङ्कन गरी जिम्मेवारीबाट हटाउने बताउनुभयो ।
