फिदिममा चिया प्रवर्धन गर्न महोत्सव

राधा लुइटेल 

फिदिम, फागुन ६ गते । पूर्वी पहाडका विभिन्न स्थानमा जैविक विधिबाट उत्पादन गरिँदै आएको अर्थोडक्स चियाको बजारमा पहुँच विस्तार गर्न फिदिममा चिया महोत्सव आयोजना गरिएको छ ।

महोत्सवमा पॉचथर, इलाम र ताप्लेजुङसहित विभिन्न स्थानमा उत्पादन भएको अर्थोडक्स चियाको प्रदर्शनी भई रहेको छ । फागुन ६ गतेसम्म चल्ने प्रदर्शनीको उद्घाटन सोमबार कार्यक्रमका प्रमूख अतिथि चिया अभियन्ता एवं पूर्व गृह राज्य मन्त्री दीपकप्रकाश बास्कोटाले चिया चाखेर गर्नुभयो ।

लाली चिया उत्पादक तथा प्रशोधन सहकारी संस्था फिदिमको आयोजना, फिदिम नगरपालिकाको प्रवर्धन र पर्यटन तथा वातावरण कार्यालय काँकड्भिट्टाको सहयोग गरेको आयोजक संस्थाका अध्यक्ष टङ्कप्रसाद राईले बताउनुभयो ।

राईका अनुसार महोत्सवमा विभिन्न स्थानमा उत्पादन भएको चियाको प्रदर्शनी, स्वाद चाख्ने, बिक्री वितरण गरिँदै छ । यस्तै चियाको बहु आयामिक पक्षमा अन्तर सम्वाद (प्यानल डिस्कस) लगायतका कृयाकलाप कार्यक्रममा समेटिएको छ ।

महोत्सवले चियाको प्रवर्द्धन, बजारीकरण, संस्कृति जगेर्ना जस्ता विषयमा मद्दत पुर्‍याउने आयोजकको दाबी छ । कार्यक्रममा देश विदेशका चिया विज्ञहरूको सहभागिता रहने बताइएको छ ।