राजु लामिछाने
रुकुमपश्चिम, पुस २६ गते । रुकुमपश्चिमको त्रिवेणी गाउँपालिका –२ को बाँदरपानी नजिकै जिप दुर्घटना भएको छ । दुर्घटनामा तीन जना घाइते भएको प्रहरीले जनाएको छ ।
जिल्ला सदरमुकाम मुसीकोट खलङगाबाट बाँदरपानीतर्फ जाँदै गरेको लु १ ज १७०९ नम्वरको जिप शुक्रबार बेलुका ७ बजे बाँदरपानी नजिकैको मोडमा दुर्घटना भएको हो ।
जिल्ला प्रहरी कार्यालयका अनुसार दुर्घटनामा परेर तीन जना घाइते भएका छन् । घाइते हुनेहरुमा मुसीकोट नगरपालिका –९ बस्ने ३० वर्षीय जयप्रकाश खड्का, त्रिवेणी गाउँपालिका –२ बस्ने ३८ वर्षीया प्रभा पुन र रोल्पाको परिवर्तन गाउँपालिका –४ बस्ने १९ वर्षीया गीता ओली रहेको जिल्ला प्रहरी कार्यालयका सूचना अधिकारी प्रहरी निरीक्षक ऋषि पाठकले जानकारी दिनुभयो ।
उहाँका अनुसार तीनै जना घाइतेको शरीरका विभिन्न भागमा चोट लागेको छ भने अवस्था सामान्य रहेको छ । तीनै जनालाई उपचारका लागि जिल्ला मुसीकोट ल्याइएको छ । जिप मोड्ने क्रममा ब्रेक फेल भएर सडकबाट करिब दुईसय मिटर तल खसेको प्रहरीको भनाइ छ । दुर्घटनाको पूरा विवरण आउन बाँकी रहेको प्रहरीले जनाएको छ ।
