विजयकुमार साह
ढल्केबर, पुस २१ गते । धनुषाको गणेशमान चारनाथ नगरपालिकाले गर्भवती तथा सुत्केरीलाई निःशुल्क सेवा दिने उद्देश्यले एम्बुलेन्स सञ्चालनमा ल्याएको छ । घरमै सुत्केरी हुने दरलाई शून्यमा झार्न र अस्पतालमा सुरक्षित रुपमा सुत्केरी गराउन अभिप्रेरित गर्ने उद्देश्यले आइतबारदेखि एम्बुलेन्स सञ्चालनमा ल्याएको नगर प्रमुख जितनारायण यादवले बताउनुभयो ।
"पालिकाभित्रका सबै गर्भवती तथा सुत्केरीलाई निःशुल्क एम्बुलेन्स सेवा उपलब्ध गराउँछौँ । यसले गर्भवती महिला तथा सुत्केरी भइसकेपछि आमा र शिशुको स्वास्थ्यका बारेमा रेखदेश र आवश्यक परामर्श दिन पनि सहज हुन्छ", उहाँले भन्नुभयो ।
गणेशमान चारनाथ नगरपालिकाका प्रमुख प्रशासकीय अधिकृत रणजित यादवले नगरभित्रका आफ्ना नागरिकलाई सहज स्वास्थ्य सेवा दिने उद्देश्यले एम्बुलेन्स सेवा सञ्चालनमा ल्याएको बताउनुभयो । गर्भवती तथा सुत्केरीलाई निःशुल्क सेवा दिने बताउँदै उहाँले अन्य प्रकारका बिरामीलाई न्यून शुल्क लिएर सेवा उपलब्ध गराउने जानकारी दिनुभयो ।
उहाँका अनुसार पालिकाभित्रका मात्र नभएर छिमेकी पालिकाका बिरामीलाई समेत एम्बुलेन्स सेवा उपलब्ध हुनेछ । आकस्मिक बिरामीलाई स्वास्थ्य संस्थासम्म लैजान सजिलो होस् भन्ने पालिकाकोे उद्देश्य छ । स्वास्थ्य संस्था टाढा भएकाले एम्बुलेन्सले नागरिकको स्वास्थ्य पहुँचमा वृद्धि गर्ने विश्वास लिइएको प्रमुख प्रशासकीय अधिकृत यादवले बताउनुभयो ।
