रेखीराम राना
तानसेन, पुस ११ गते । तानसेन नगरपालिकाद्वारा सञ्चालित ‘मेयर कप फुटबल’ को उपाधि तानसेन–१ ले हात पार्न सफल भएको छ । बिहीबार तानसेनको टुंडिखेल मैदानमा भएको प्रतियोगितामा तानसेन –१ ले तानसेन –९ को समूहलाई ३–२ गोल अन्तरले हराएको हो ।
विजेता समूहलाई तानसेनका नगर प्रमुख सन्तोषलाल श्रेष्ठ र उपप्रमुख प्रतीक्षा सिंजालीगाहाले नगद, रनिङ् शिल्ड, प्रमाणपत्र र मेडल प्रदान गर्नुभयो । मेयर कपको उपाधि विजेता तानसेन –१ ले एक लाख ५५ हजार नगद पाएको छ । यस्तै उपविजेता तानसेन–९ ले ७५ हजार नगदसहित प्रमाणपत्र र मेडल प्राप्त गरेको छ ।
तानसेनमा खेल क्षेत्रको विकास गरी व्यावसायिक खेलाडी उत्पादन गर्न हरेक वर्ष मेयर कपको आयोजना गरिएको नगर प्रमुख श्रेष्ठले बताउनुभयो । खेल क्षेत्रको माध्यम्बाट युवाको नेतृत्व विकाससहित खेलाडी पहिचानका लागि प्रतियोगिताले सहयोग गरेको उहाँले बताउनुभयो ।
प्रतियोगितामा बेस्ट प्लेयर, बेस्ट किपर, राइजिङ् प्लेयर, वेस्ट मिड फिल्डर, मेन अफ दि मेच घोषित खेलाडीलाई नगरसहित सम्मान गरिएको नगर खेलकुद विकास समितिका अध्यक्ष हेमन्तराज शाक्यले जानकारी दिनुभयो । यसअघि नगरपालिकाले क्रिकेट र व्याडमिन्टन प्रतियोगिता सम्पन्न गरिसकेको छ ।
