काठमाडौँ, पुस ११ गते । नेपाल क्रिकेट सङ्घ (क्यान) को आयोजनामा पुस २१ गतेदेखि एलाइट कप दुई दिवसीय राष्ट्रिय क्रिकेट प्रतियोगिता हुने भएको छ ।
‘जय ट्रफी मेन्स एलाइट कप’ नामाकरण दिइएको प्रतियोगितामा नेपाल पुलिस क्लब, त्रिभुवन आर्मी क्लब, बागमती प्रदेश र मधेश प्रदेशको सहभागिता रहनेछ । माघ ३ गतेसम्म चल्ने प्रतियोगिताका खेलहरू वीरगञ्ज र जनकपुरमा हुने क्यानले जनाएको छ ।
क्यानले सङ्घका पूर्व अध्यक्ष स्वर्गीय जयकुमार नाथ शाहको नाममा यस प्रतियोगिता आयोजना गर्न लागेको हो । यस प्रतियोगितामा गत वर्ष सम्पन्न प्रधानमन्त्री कप राष्ट्रिय क्रिकेट प्रतियोगिताको शीर्ष चार टोलीलाई सहभागी गराउन लागिएको हो ।
