वैदेशिक रोजगारीमा लाखौं ठगी गर्ने दुई जना पक्राउ

काठमाडौं, पुस ९ गते। प्रहरीले वैदेशिक रोजगारीमा पठाउने भनी लाखौं ठगी गर्ने दुई जनालाई पक्राउ गरेको छ।

काठमाडौं उपत्यका अपराध अनुसन्धान कार्यालय, टेकुका सूचना अधिकारी प्रहरी उपरीक्षक काजीकुमार आचार्यका अनुसार सर्विया पठाउने भन्दै चार लाख रुपियाँ ठगी गरी सम्पर्कबिहीन बनेका स्थायी घर सिन्धुपाल्चोकको बाह्रबिसे नगरपालिका–२ कर्थली भएर हाल काठमाडौं नयाँ बानेश्वर बस्ने ३५ वर्षीय रमेश खड्का पक्राउ परेका छन्।

यसैगरी, अमेरिका पठाउने भनी दुई लाख १७ हजार रुपियाँ ठगी गरी सम्पर्कबिहीन बनेका स्थायी घर नुवाकोट विदुर नगरपालिका घर भएर  हाल काठमाडौंको कलंकी बस्ने ३६ वर्षीया पुन्यवती जोशी पक्राउ परेका छन्।

उनीहरूमाथि थप अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।