नवराज कट्टेल
विराटनगर, मङ्सिर २१ गते । गोरखापत्र संस्थानका वरिष्ठ सहायक शिवनारायण मण्डलको निधन भएको छ । उच्च रक्तचापको समस्या देखिएपछि विराटनगरस्थित आर्या न्यूरो हस्पिटलमा उपचारका क्रममा बिहीबार उहाँको निधन भएको गोरखापत्र संस्थान विराटनगरका प्रादेशिक कार्यालयका प्रमुख राजकुमार गुरुङले जानकारी दिनुभयो ।
२०२६ भदौ १६ गते जन्मनुभएका मण्डल २०५८ मङ्सिर २२ गतेदेखि गोरखापत्र संस्थानमा सेवारत हुनुहुन्थ्यो । हाल उहाँ गोरखापत्र संस्थानको प्रादेशिक कार्यालय विराटनगरमा कार्यरत रहनुभएको थियो ।
गत मङ्सिर ५ गते उच्च रक्तचापका कारण बेहोस भएपछि उहाँलाई उपचारका लागि अस्पताल भर्ना गरिएको थियो । विराटनगर–८ स्थायी निवासी मण्डलका श्रीमती, एक छोरा, चार छोरी रहनुभएको परिवारका सदस्यले जानकारी दिनुभयो । मण्डलको शुक्रबार विराटनगरस्थित परोपकारघाटमा अन्त्येष्टि गरिएको छ ।
