टीकापुर समाचारदाता
टीकापुर, कात्तिक १४ गते । गत वर्ष फूल नबिकेर घाटामा जानुभएका टीकापुर नगरपालिका–१ वनगाउँका किसान सीताराम चौधरी यस वर्ष आशावादी हुनुहुन्छ । टीकापुर नगरपालिकाले भाइटीका आउन दुई हप्ताअघि नै यस वर्ष टीकापुरको बजारमा प्लास्टिकका माला बिक्रीवितरण नगर्न सार्वजनिक सूचना जारी गरिसकेको छ ।
एक बिघा पाँच कट्ठा जमिनमा फूलखेती गर्नुभएका चौधरीले गत वर्ष पाँच क्विन्टल फूल टिपेको र त्यत्तिकै फूल नटिपेर बारीमा सुकेको थियो । डेढ लाखको फूल मात्रै बेचेर पाँच लाखको फूल खेर गएका चौधरीले यस वर्ष एक बिघामा मात्रै फूल रोप्नुभएको छ । गत वर्ष १४ कट्ठामा फूल खेती गर्नुभएका जानकी गाउँपालिका–१ का किसान छत्र मल्लले यस वर्ष पाँच कट्ठामा मात्रै फूल लगाएको बताउनुभयो ।
