राजु लामिछाने
रुकुमपश्चिम, कात्तिक ३ गते । विकासको कुरा गर्दा सधैँ चर्चामा रहने रुकुमपश्चिमका तीन गौरवका योजना वर्सौंदेखि अलपत्र अवस्थामा छन् । चौरजहारी नगरपालिका–१ मा रहेको चौरजहारी विमानस्थल बन्द अवस्थामा छ भने रुकुमपश्चिम र जाजरकोट जोड्ने भेरी नदी र मुसीकोटको पितिबाङखोलामाथिको पक्की पुल अलपत्र अवस्थामा छन् ।
भेरी नदीमाथिको पुल मध्यपहाडी राजमार्ग अन्तर्गत पर्छ भने पितिबाङखोलामाथिको पुल राप्ती राजमार्ग अन्तर्गत पर्छ । जिल्लाको विकासका लागि गौरव योजनाका रूपमा रहेका यी योजना वर्सौंदेखि अलपत्र हुँदा स्थानीयवासीले सहज यातायात सेवा लिन पाएका छैनन् । २०२८ सालदेखि सञ्चालनमा आएको चौरजहारी विमानस्थल २०७० सालको फागुनबाट सञ्चालनमा छैन । रुकुम, सल्यान र जाजरकोट जिल्लालाई लक्षित गरी निर्माण गरिएको यो विमानस्थल कालोपत्रे गरिएपछि बन्द भएको हो । बरु कालोपत्रे नहुँदा चल्ने गरेको यो विमानस्थल कालोपत्रे भएपछि बन्द हुँदा यहाँका बासिन्दा अचम्म परेका छन् । २०७० फागुनदेखि २०७२ भदौसम्म धावनमार्ग कालोपत्रे गरिएको थियो । पाँच करोड ५९ लाख ४९ हजार ९५२ रुपियाँको लागतमा धावनमार्ग कालोपत्रे भएपछि यहाँ जहाज आउनै छोडेका छन् ।
विमानस्थल सञ्चालनमा आउने सुरसार छैन । स्थानीय तेजबहादुर विष्टले करोडौँको सरकारी बजेट खर्चिएको विमानस्थल बन्द हुनु लाजमर्दो भएको उहाँले बताउनुभयो । उहाँले चाडपर्वको बेला कच्ची सडकमा जोखिमपूर्ण यात्रा गर्दै आउनुपर्ने बाध्यता रहेको बताउनुभयो ।
उहाँले भन्नुभयो, “न गतिलो सडक बनेको छ, न भएको एयरपोर्टमा जहाज आउँछ । राज्यको ठुलो सम्पति खेर गइरहेको छ, जनताले कष्ट भोगिरहेका छन् ।” चाडबाडको बेला सहरबजार तथा परदेशबाट घर फर्कनेको भिडले गाडीको यात्रा उत्तिकै चुनौतीपूर्ण रहेको छ ।
राजमार्गका पुल अलपत्र
चौरजहारी नगरपालिका–२, अधेरेबाट जाजरकोटको भेरी नगरपालिका–१३, कुदु जोड्ने गरी भेरी नदीमा पुल बनाउन २०६९ सालमै वाइपी कन्स्ट्रक्सन प्रालिले ठेक्का पाएको थियो । तीन वर्षमै निर्माण सम्पन्न गर्ने जिम्मा पाएको उक्त कम्पनीले दुवैतर्फ सामान्य पिल्लर मात्रै खडा गरेर हालसम्म काम अलपत्र पारेको छ ।
मध्यपहाडी राजमार्ग आयोजना कार्यालय दैलेखका इन्जिनियर अमितकुमार मण्डलका अनुसार उक्त ठेक्का रद्द गरेर नयाँ ठेक्का प्रक्रिया सुरु गर्दा पनि ठेक्का लाग्न सकेको छैन । दुई पटक ठेक्का खोल्दा पनि ठेक्का नलागेकाले अब के गर्ने भन्नेबारेमा छलफल भइरहेको उहाँले जानकारी दिनुभयो । पुल नबन्दा सडक आयोजनाको स्तरोन्नति र कालोपत्रेको कामसमेत प्रभावित भएको छ भने राजमार्गको रुकुमपश्चिम खण्डबाट जाजरकोट यातायातका साधन आउजाउ गर्ने बाटोसमेत खुलेको छैन ।
राप्ती राजमार्ग अन्तर्गत मुसीकोट नगरपालिका ११ र १२ जोड्ने पितिबाङखोलामा निर्माण थालिएको पक्की पुल पनि ठेक्का सम्झौता भएको पाँच वर्षदेखि अलपत्र छ । उक्त पुल निर्माणका लागि संरक्षण निर्माण सेवा प्रालि चितवन र सडक डिभिजन कार्यालय चौरजहारीबिच २०७६ साल असार ८ गते सम्झौता भएको थियो । सो सम्झौता अनुसार काम हुन सकेको छैन । जिल्ला प्रवेशको मुख्य नाकानजिक रहेको खोलामा पुल नहुँदा सर्वसाधारणले सास्ती पाउने गरेका छन् ।
सडक डिभिजन कार्यालय चौरजहारीका प्रमुख तेजस्वी शर्माले पटक पटक ताकेता तथा सार्वजनिक सूचना जारी गर्दा पनि ठेकेदार कम्पनीले अटेरी गरिरहेको बताउनुभयो । ठेक्का तोड्ने प्रक्रिया सुरु गरे पनि पुरा हुन नसकेको उहाँको भनाइ छ ।
