ढाका, असोज ७ गते । निरङ्कुश प्रधानमन्त्री शेख हसिनालाई अपदस्थ गर्ने विद्यार्थीको नेतृत्वमा भएको विद्रोहका कारण एक हप्ता लामो बन्दपछि बङ्गलादेशको ढाका विश्वविद्यालयका विद्यार्थीहरू आइतबारदेखि कक्षामा फर्किएका छन् ।
रोजगारी आरक्षणको विरोधमा हसिनाको १५ वर्षको कठोर शासनको अन्त्य गर्न राष्ट्रव्यापी सङ्घर्षमा परिणत भएपछि हजारौँले क्याम्पस र वरपरको शाहबाग क्षेत्रहरूमा प्रदर्शन गरे ।
जुलाईमा विरोध प्रदर्शन बढ्दै गएपछि अधिकारीहरूले सयौँको ज्यान लिने प्रदर्शनहरूमा कारवाहीका रूपमा क्याम्पस परिसर बन्द गरे ।
विश्वविद्यालयमा भर्ना भएका धेरै शीर्ष विद्यार्थी आन्दोलनका नेतामध्ये केहीलाई सादा पोसाकका प्रहरीले पक्राउ गरी धेरै दिनसम्म हिरासतमा राख्यो ।
आइतबार लेक्चर (व्याख्यान) हलहरू फेरि भरिएका थिए । विद्यार्थीहरूले रूखले ढाकिएको पैदल मार्गहरूमा समूहमा च्याट गरिरहेका थिए र क्यान्टिनमा पेय पदार्थ र खाजाहरू किनेका थिए ।
“धेरै समयपछि कक्षामा फर्केर धेरै राम्रो महसुस गरिरहेकी छु”, राजनीतिशास्त्र अध्ययन गर्ने अर्पिता दासले भन्नुभयो, “हाम्रा शिक्षकले हामीलाई कक्षामा फूल लगाएर स्वागत गर्नुहुँदा यो नयाँ विद्यार्थीहरूको स्वागतजस्तै थियो ।”
हसिनाको अवामी लिग पार्टीलाई समर्थन गर्ने प्रदर्शनकारी र विद्यार्थीहरूले ढुङ्गा, लाठी र फलामको रडले आपसमा झगडा गर्दा जुलाईमा क्याम्पसमा भएको चर्को लडाइँमा आफू उपस्थित भएको दासले बताउनुभयो ।
“हामीलाई कक्षा, अध्ययन र परीक्षामा जाने दैनिकीमा बानी परेको थियो”, उहाँले भन्नुभयो, “हामी फेरि कक्षा सुरु हुने र हाम्रो पढाइ पूरा गर्न सक्छौँ कि भनेर धेरै अनिश्चिततामा थियौँ ।”
सहायक प्रोक्टर मोहम्मद महबुब क्वैसरले यसअघि हसिनाप्रति वफादार प्रशासकहरूले राजीनामा दिएपछि नियुक्त भएका चार–पाँच विभागबाहेक सबैमा फेरि कक्षा सुरु भएको जानकारी दिनुभयो । “विद्यार्थीहरु खुशीसाथ सहभागी भइरहेका छन्”, उहाँले भन्नुभयो ।
हसिनाको सरकारमाथि राजनीतिक प्रतिद्वन्द्वीहरूको सामूहिक हिरासत र गैरन्यायिक हत्यालगायत व्यापक दुर्व्यवहारको आरोप लगाइएको थियो ।
संयुक्त राष्ट्रसङ्घको प्रारम्भिक प्रतिवेदनअनुसार अगस्टको सुरुमा हसिनालाई पदच्युत गर्ने हप्ताहरूमा छ सयभन्दा बढी व्यक्तिको मृत्यु भएको थियो । प्रतिवेदनमा मर्नेहरूको सङ्ख्या ‘सम्भवतः कम आकलन’ गरिएको बताइएको थियो ।
छिमेकी भारतमा निर्वासनका लागि हसिनाको प्रस्थानपछि क्याबिनेट मन्त्रीहरू र उहाँको पार्टीका अन्य वरिष्ठ सदस्यहरू पक्राउ परेका छन् र उहाँको सरकारमा नियुक्त भएकाहरूलाई अदालत र केन्द्रीय बैंकबाट हटाइएको छ ।
“यस्तो थियो कि हामी दमनकारी युगमा थियौँ र हामी हामी केही भन्न सक्तैन थियौँ”, हसिनाले आदेश दिएको कारबाहीबारे २५ वर्षीय स्नातकोत्तर विद्यार्थी कलिमुल्ला अल काफीले भन्नुभयो, “आज यस्तो लाग्छ कि म स्वतन्त्रतासँग कक्षामा उपस्थित छु, हामी स्वतन्त्र रूपमा व्यक्त गर्न सक्छौँ ।” रासस/एएफपी
