चेपाङ जातिबाट सात जना वडा अध्यक्षको चुनावी दौडमा

मुरारी अधिकारी

धादिङ, बैशाख २६ गते । बैशाख ३० गते हुन गइरहेको स्थानीय तहको निर्वाचनमा धादिङका सातजना चेपाङले वडा अध्यक्षका लागि उम्मेदवारी दिएका छन् । विभिन्न राजनीतिक दलबाट सीमान्तकृत चेपाङ समुदायका व्यक्तिहरुले वडा अध्यक्ष पदका लागि उम्मेदवारी दिएका हुन् । 

वडा अध्यक्षको उम्मेदवारी दिनेमा एक महिलासहित सातजना चेपाङ छन् । सातैजना उम्मेदवारहरु वडाको समग्र विकास, सामाजिक रुपान्तरण अनि चेपाङ समुदायको विकास र उत्थानका लागि आफ्नो उम्मेदवारी रहेको बताउनुहुन्छ ।

बेनीघाट रोराङ गाउँपालिकाको वडा नम्बर – ९ मा पनि नेपाली काँग्रेसका तर्फबाट राजेन्द्र चेपाङले वडा अध्यक्षको उम्मेदवारी दिनुभएको छ । उक्त वडामा ४२ प्रतिशत चेपाङ छन् । उक्त वडालाई ‘भोट बैंक’को रुपमा मात्र प्रयोग गरिएको अब नेतृत्वका लागि नै हामी आफू अगाडि सरेको राजेन्द्र चेपाङ बताउनुहुन्छ । 

अबको नेतृत्व चेपाङ समुदायबाट सामाजिक क्षेत्रमा प्रवेश गरेको आफूले नै गर्ने चेपाङको भनाइ छ । निर्वाचन जित्नका लागि आफूसँग पाँचवर्षे रणनीति रहेको र समग्र वडाको विकास र चेपाङ समुदायको सर्वाङ्गीण विकास गर्न सक्ने क्षमता आफूमा रहेकाले आफूले उम्मेदवारी दिएको चेपाङको भनाइ छ । 

नेपाली काँग्रेसका विकास चेपाङले बेनीघाट रोराङ गाउँपालिका वडा नम्बर १० को वडा अध्यक्षमा उम्मेदवारी दिनुभएको छ । विकास चेपाङको निर्वाचन जितेमा वडाका सबै टोललाई  बिजुली बत्ती पुर्याउने र सडक सञ्जालमा जोड्ने योजना छ । उहाँ भन्नुहुन्छ, ‘‘विकास हुन सडक सञ्जाल र बिजुली बत्ती चाहिने रहेछ । तर हाम्रो वडामा आधारभूत आवश्यकताको सहज पहुँच पहिलो आवश्यकता हो । यो उद्देश्य पूरा गर्न मेरो उम्मेदवारी हो ।’’

 वडा अध्यक्ष उम्मेदवार विकास चेपाङ समुदायको जीवनस्तर सुधारका लागि चेपाङ समुदायले नै नेतृत्व तहमा पुग्न आवश्यक देखिएकाले आफू उम्मेदवार बनेको बताउनुभयो । चेतनाको अभाव, आर्थिकस्तरमा कमजोरीले चेपाङहरु सधँै पछाडि पारिएको छ, चेपाङको कला, संस्कृति र सभ्यताका साथ विकासका पूर्वाधारमा सहज पहुँच बनाउन आफू राजनीतिमा अगाडि आएको उहाँको भनाइ छ । 

गजुरी गाउँपालिका वडा नं ३ मा शोभा चेपाङले एकीकृत समाजवादीका तर्फबाट अध्यक्षमा उम्मेदवारी दिनुभएको छ । पृथ्वी राजमार्गबाट करिब आधी घण्टा दूरीमा रहेको ३ नम्बर वडामा गाँस, बास, कपास, शिक्षा, स्वास्थ्य, सुरक्षा तथा रोजगारीको अभावमा पिल्सिएर बसेका जनताको सेवाका लागि आफू उम्मेदवार बनेको शोभा चेपाङको भनाइ छ ।

चेपाङ समुदायमा सबै चिजको कमी छ, आत्मनिर्भर बनाउन आयस्रोत चाहिने रहेछ, वडाबासीको मुख्य आयस्रोत कृषि हो तर बिचौलियाको कारण हामी मारमा छौं । आधुनिक कृषि प्रणालीबाट वडाबासीको जीवन फेर्न सक्छु भन्ने लागेर आफू वडा अध्यक्ष पदमा उम्मेदवार बनेको शोभाको भनाइ छ । 

बेनीघाट रोराङ गाउँपालिका वडा नम्बर ८ मा चेपाङहरु नै प्रतिस्पर्धामा छन् । झण्डै ६० प्रतिशत चेपाङ जातिको बसोबास रहेको यस वडामा नेकपा एमालेबाट आकाश चेपाङ र नेपाली काँग्रेसबाट भीमबहादुर चेपाङले उम्मेदवारी दर्ता गराउनुभएको छ । 

आकाश चेपाङ आफूले सामाजिक क्षेत्रमा गरेको योगदान र वडाबासीको समस्या तथा सवाललाई नजिकबाट नियालेकाले वडा अध्यक्ष बन्ने बताउनुहुन्छ । वडाबासीकै चाहना र माग अनुसार वडा अध्यक्षको उम्मदेवारी दिएको आकाशको भनाइ छ । 

नेपाली कांग्रेसबाट उम्मेदवारी दिनुभएका भीमबहादुर चेपाङ सीमान्तकृत चेपाङहरुले टिकट पाउनमा नै समस्या रहेको बताउनुहुन्छ । आफूले जितेमा चेपाङ समुदायमा रहेका अभाव, कठिनाइ र आवश्यकतालाई सम्बोधन गर्ने बताउनुभयो । 

गजुरी गाउँपालिका वडा नम्बर ४ को वडा अध्यक्षमा नेपाली काँग्रेसबाट सुरेन्द्र प्रजा र एकीकृत समाजवादीबाट हर्कबहादुर चेपाङले उम्मेदवारी दिनुभएको छ । सुरेन्द्र प्रजा एक कार्यकाल वडा अध्यक्ष भइसक्नुभएको छ । 

वडा अध्यक्षको दरिलो उम्मेदवारको दाबी गर्दै प्रजा २०७४ सालको स्थानीय तहको निर्वाचनबाट विजयी भइसकेपछि धेरै कामहरु गरेको र  कतिपय योजनाहरु पूरा गर्नुपर्ने रहेकाले आफू उम्मेदवार बनेको बताउनुहुन्छ ।

चेपाङ र तामाङ समुदायको ९८ प्रतिशत बसोबास रहेको यस वडामा आधारभूत आवश्यकता र अन्य विकासका बाँकी रहेका योजनाहरु पूरा गर्न आफूले उम्मेदवारी दिएको उहाँको भनाइ छ । सडक सञ्जाल, स्वास्थ्य, खानेपानीजस्ता क्षेत्रलाई प्राथमिकतामा राखेर काम गर्ने वडा अध्यक्ष उम्मेदवार हर्कबहादुर चेपाङले बताउनुभयो । हामी पछाडि पारिएका समुदायमा पर्छाैं तर नेतृत्व लिएर वडालाई विकासको बाटोमा डोहो¥याउने हर्कमानको भनाइ छ ।