काठमाडौं, भदौ १६ गते । सत्तारुढ दल नेपाली कांग्रेसको केन्द्रीय समितिको बैठकले पार्टीलाई बलियो बनाइ एक्लै निर्वाचन जित्नसक्ने अवस्थामा पुर्याउने निर्णय गरेको छ ।
आइतबार पार्टी केन्द्रीय कार्यालय सानेपामा बसेको पार्टीको केन्द्रीय समितिको बैठकले पार्टीलाई बलियो बनाउने निर्णय गरेको हो । बैठकपछि सञ्चारकर्मीहरूसँग कुरा गर्दै पार्टीका प्रवक्ता डा. प्रकाशशरण महतले बैठकमा उपसभापति पूर्णबहादुर खड्का र महामन्त्रीद्वय गगन थापा तथा विश्वप्रकाश शर्माले राख्नुभएको, नीतिगत, साङ्गठनिक र समसामयिक प्रस्ताव उपर छलफल भएको बताउनुभयो ।
उहाँले महामन्त्री थापाले निर्वाचनअघि गठबन्धन गर्न नहुने प्रस्ताव छलफल भई सोही दिशामा अघि बढ्ने निर्णय भएको बताउनुभयो । प्रवक्ता डा. महतले कांग्रेसको सङ्गठनलाई चुस्त, दुरुस्त रूपमा गाउँगाउँमा पुर्याउने, सङ्गठनको अभियानलाई अगाडि बढाउने सम्बन्धमा निर्णय भएको बताउनुभयो । सक्रिय सदस्यता नवीकरण गर्ने, नयाँ सदस्यता दिने बारेमा पनि निर्णय भएको छ ।
त्यस्तै, चुनावअघिको गठबन्धनबारे पार्टीलाई केन्द्रबिन्दुमा राखेर पार्टीलाई बलियो बनाउने, एकीकृत गर्ने निर्णय भएको बताउनुभयो । प्रवक्ता महतले भन्नुभयो, ‘‘गठबन्धनका सम्बन्धमा पनि जुन प्रस्ताव महामन्त्रीको प्रस्तावमा आएको थियो । अहिलेको परिवेशमा सबै कुरालाई मध्यनजर गरी पार्टीलाई नै केन्द्रबिन्दुमा राखेर पार्टीलाई बलियो बनाउने, एकीकृत गर्ने र पार्टी सङ्गठनलाई बलियो बनाएर एक्लै जित्नसक्ने परिस्थिति निर्माण गर्ने भन्नेतिर नै निर्णय केन्द्रित भएको छ ।’’
महामन्त्री शर्माले एक पटक मात्रै राष्ट्रपति, दुई पटक मात्रै प्रधानमन्त्री, मन्त्री तीन पटक मात्रै मन्त्री र चार पटक मात्रै सांसद बन्ने व्यवस्था गर्न प्रस्ताव गर्नुभएको थियो ।
उहाँले महाअधिवेशनका सन्दर्भमा पार्टीको विधानले व्यवस्था गरेअनुसार अधिवेशन समयमा नै सम्पन्न गर्ने निर्णय भएको बताउनुभयो ।
महामन्त्री विश्वप्रकाश शर्माको समसामयिक प्रस्तावमा उल्लिखित एग्जिट पोलिसिको सम्बन्धमा छलफल गर्दा निर्णय गर्न केन्द्रीय समितिले आवश्यक नठानेको र संविधानसँग पनि जोडिने भएकाले संविधान संशोधनका क्रममा छलफल अघि बढाउने निर्णय भएको बताउनुभयो ।
बैठकपछि मुख्य सचिव कृष्णप्रसाद पौडेलले जारी प्रेस विज्ञप्तिमा भनिएको छ, ‘‘नेपाली कांग्रेस र नेकपा (एमाले) बिच २०८१ असार १७ गते भएको सात बुँदे सहमति राष्ट्रिय हितको रक्षा गर्न, भ्रष्टाचार नियन्त्रण गरी देशमा सुशासन कायम गर्न, विकास निर्माणको अभियानलाई तीव्रता दिन, राजनीतिक स्थिरता कायम गर्न, संविधानको अभ्यासको समीक्षा गरी सङ्घीय लोकतान्त्रिक गणतन्त्रात्मक व्यवस्था र समानुपातिक समावेशी प्रतिनिधित्वलाई सुदृढ गर्ने गरी संविधान संशोधन गर्ने उद्देश्य प्राप्तिका लागि हो भन्ने कुरामा नेपाली कांग्रेस प्रस्ट छ र उक्त सहमतिलाई कार्यान्वयन गर्न नेपाली कांग्रेसको यो बैठक पुनः दृढता व्यक्त गर्दछ ।’’
यसैगरी, विधान संशोधन मस्यौदा समिति गठन गर्ने १०० दिने साङ्गठनिक अभियान सञ्चालन गर्ने निर्णय गरेको छ । सो अभियान २०८१ असोज १ गतेदेखि पुस १० गतेसम्म सञ्चालन हुने छ ।
१४ बुँदामा सरकारको ध्यानाकर्षण
कांग्रेसले १४ बुँदामा सरकारको ध्यानाकर्षण गराउने निर्णय गरेको छ । ती निर्णय यी हुन् :
१. बढ्दो हवाई तथा सडक दुर्घटना न्यूनीकरण गर्न प्रभावकारी प्राविधिक, प्रशासनिक एवं व्यावहारिक सुधारका लागि आवश्यक कानुनी बन्दोबस्त गर्न सरकारलाई आग्रह गर्दछ ।
२. सार्वजनिक सेवाको क्षेत्रमा हुने ढिलासुस्ती, बेथिति र विकृतिको अन्त्य गर्दै सेवाग्राहीमा सकारात्मक अनुभूति हुन सक्ने गरी सर्वसुलभ सेवा प्रदान गर्ने ।
३. दुग्ध विकास संस्थानले दुध उपभोक्तालाई सहज ढङ्गबाट बजारमा दुध उपलब्ध गराउन किसानहरूबाट दुध सङ्कलन गर्ने र उपभोक्ता बिच पुराउने दायित्व हो । तर किसानहरूबाट सस्तो मूल्यमा उधारो खरिद गर्ने र महँगो मूल्यमा नगदमा बिक्री गर्ने गर्दासमेत किसानलाई दिनु पर्ने दूधको मूल्य भुक्तानी विलम्ब र अनिश्चित हुनु निश्चय नै गम्भीर र दुःखलाग्दो विषय हो । यसबाट आम दुग्ध किसानलाई परिरहेको पीरमर्कालाई हृदयङ्गम गर्दै उनीहरूलाई अविलम्ब भुक्तानी दिन नेपाली कांग्रेस सरकारसँग जोडदार माग गर्दछ ।
४.नागरिकको स्वास्थ्य उपचारलाई सहज र सुलभ बनाउन प्रारम्भ गरिएको स्वास्थ्य बिमाको क्षेत्रमा कतिपय अप्ठ्यारा देखिएका छन् । बिमित नागरिकले बिमाकै आधारमा उपचार गर्न नपाएको तथा असहज र झन्झटिलो भएको गुनासो सुनिएको छ । बिमितको अधिकार सुनिश्चित गर्दै यस क्षेत्रमा देखिएको सबै जटिलताहरूलाई हटाई सबै नागरिकलाई स्वास्थ्य बिमाप्रति आकर्षित गर्न, स्वास्थ्य बिमालाई एकद्वार प्रणाली लागू गरी बिमाको रकम बढाई रु. ५ लाख कायम गर्न सरकारसँग माग गर्दछ ।
५.चाडबाडलाई लक्षित गरी कालाबाजारी, मिसावटखोर र बिचौलियाबाट आम उपभोक्ता ठगिने गरेकोले सङ्घ, प्रदेश र स्थानीय तहबाट सघन र प्रभावकारी अनुगमन गर्न सरकारको ध्यानाकर्षण गर्दछ । साथै, चाडबाडको लागि अत्यावश्यक बस्तुको रूपमा रहेको चामल, दाल, चिनी लगायतका दैनिक उपभोग्य वस्तुहरूको कृत्रिम अभाव सृजना हुन सक्ने अवस्थालाई मध्यनजर गरी बजारको माग बमोजिम उक्त वस्तुहरूको समयमै आपूर्ति व्यवस्था सहज गरी बजार नियमनको प्रभावकारी कदम चाल्न सरकारको ध्यानाकर्षण गर्दछ ।
६. अव्यवस्थित बसोबासी, सुकुम्वासी र भूमिहीनहरूको समस्या समाधान गर्न अघिल्लो आयोगले गर्दै आएको कार्यलाई निरन्तरता दिने गरी कानुनीलगायतका आवश्यक अन्य प्रभावकारी कार्य गर्न सरकारको ध्यानाकर्षण गर्दछ ।
७. जनभावना अनुसार सङ्घीयतालाई सुदृढ र प्रभावकारी बनाउँदै जनताका अधिकारसँग सम्बन्धित प्रक्रियामा रहेका विधेयकहरू अविलम्ब अघि बढाइयोस् ।
८. संविधान सभाबाट बनेको सङ्घीय समावेशी लोकतान्त्रिक गणतन्त्र नेपालको संविधानले सुनिश्चित गरेका नागरिकका मौलिक हकहरू कार्यान्वयनका लागि निश्चित समय अवधि भित्र बन्नु पर्ने कानुनहरू अझै पनि बन्न नसक्दा उनीहरूको हक कार्यान्वयन हुन सकेको छैन । तसर्थ, मौलिक हकसँग सम्बन्धित बन्नु पर्ने आवश्यक कानुनहरू यथाशीघ्र बनाउन सरकारसँग माग गर्दछ ।
९. सहकारी सञ्चालकबाट ठगिएका बचतकर्ताको बचत सुरक्षित गर्दै बचतकर्तालाई न्याय दिलाउन र सञ्चालकको लगानी असुल गराउने प्रभावकारी नीति लिन नेपाली कांग्रेस केन्द्रीय कार्यसमितिको बैठकले पटक–पटक सरकारको ध्यानाकर्षण गराइसकेकोले यस विषयमा कुनै विलम्ब नगरी प्रक्रियामा रहेका सबै मुद्दाहरू चाडै टुङ्गो लगाउन र दोषी देखिएकालाई यथाशीघ्र कानुनी दायरामा ल्याई समस्याको दीर्घकालीन समाधान गर्न आवश्यक रणनीतिक कदम चाल्न समेत सरकारसँग जोडदार माग गर्दछ ।
१०. अन्तर्राष्ट्रिय मैदानमा हाम्रा खेलाडीहरू राम्रोसँग प्रदर्शन गरिरहेका छन् तर सुविधा सम्पन्न रङ्गशाला नभएको र खेलाडीलाई उचित सेवा, सुविधा नभएको गुनासो रहेको छ । सुविधा सम्पन्न रङ्गशाला निर्माण, विस्तार तथा उचित सेवा, सुविधा दिई खेलाडीहरूलाई आकर्षित र प्रोत्साहित गरी खेलकुद क्षेत्रको विकासमा सरकारले अविलम्ब उपयुक्त कदम चालोस् भन्ने यो बैठक माग गर्दछ ।
११. यस वर्ष प्रकाशित एसइई र कक्षा १२ को परीक्षाफलमा अधिकांश विद्यार्थी अनुत्तीर्ण भएको परिस्थितिलाई नेपाली कांग्रेसले गम्भीर चिन्ताको रूपमा लिएको छ । राष्ट्रको सर्वाङ्गीण विकासका लागि किशोर किशोरीको शिक्षा र रोजगारीमा विशेष ध्यान दिनु पर्ने कुरामा हाम्रो अटुट विश्वास छ । बिग्रँदो शैक्षिक अवस्थालाई सुधार गरी स्वदेशमै सर्वसुलभ र गुणस्तरीय शिक्षा तथा रोजगारीका अवसर निर्माण गर्न नेपाली कांग्रेसले विषय विज्ञ एवं सरोकारवालाहरूको परामर्शबाट गरी विद्यालयदेखि विश्वविद्यालयसम्मको समयसापेक्ष ‘शिक्षा नीति’ निर्माण गर्नेछ । विद्यालय शिक्षा पूर्ण रूपमा निःशुल्क बनाउने र वर्तमान शिक्षा क्षेत्रमा देखिएका तमाम समस्या समाधानका लागि उचित कदम चाल्न नेपाली कांग्रेस नेपाल सरकारको ध्यानाकर्षण गर्दछ ।
१२. यस वर्ष अति भारी वर्षाका कारण बाढी, पहिरो, डुबान लगायतका प्राकृतिक विपदमा परी सयौँको सङ्ख्यामा नागरिकले ज्यान गुमाउनु परेको, हजारौँको सङ्ख्यामा विस्थापित हुनु परेको, खेती योग्य जमिन, पशु चौपाया लगायत भौतिक सम्पत्ति तथा देशभरको सडक सञ्जालमा पुग्न गएको क्षतिबाट उत्पन्न परिस्थितिले नागरिकको जीवन कष्टकर भएको विदितै छ । सम्पूर्ण पीडितहरूको यो संवेदनशीलताप्रति नेपाली कांग्रेस केन्द्रीय कार्यसमितिको यो बैठक सहानुभूति प्रकट गर्दछ । पीडित नागरिकको जीवन सहज बनाउनका लागि सरकारले उचित क्षतिपूर्ति र पुनर्वासको व्यवस्था सहित उपयुक्त कदम चाल्नका लागि नेपाली कांग्रेस जोडदार माग गर्दछ ।
१३. हरेक वर्ष नेपाली किसानहरूले भोग्नुपरेको मलको अभाव अन्त्य गर्न दीर्घकालीन समाधानको उपाय अवलम्बन गर्न यो बैठक सरकारसँग माग गर्दछ ।
१४. नेपालको इतिहासमा पारा ओलम्पिक खेलमा पहिलो पटक पदक विजेता पलेसा गोवर्धनले राष्ट्रको गौरव र शान बढाउनु भएकाले आजको बैठक उहाँलाई विशेष बधाई ज्ञापन गर्दै उच्च सम्मान गर्ने निर्णय गर्दछ ।
