जनार्जन खत्री
सर्लाही, साउन ३ गते। सर्लाहीको ईश्वरपुर नगरपालिका–१३, श्रीनगर आले टोलमा श्रीमती र छोरी मिलेर एक पुरुषको हत्या गरेका छन्।
स्थानीय ५९ वर्षीय जङ्गलबहादुर बलको आफ्नै परिवारका सदस्यबाट हत्या भएको हो। प्रहरीले जङ्गलबहादुरको हत्यामा संलग्न श्रीमती ६६ वर्षीया रिता बल र विवाहित छोरी सिरहा जिरोमाइल घर भएकी २५ वर्षीया शीतल लामालाई नियन्त्रणमा लिएको छ।
श्रीमती रिता र छोरी शीतल मिलेर घरायसी विवादमा जङ्गलबहादुरलाई मरणासन्न हुने गरी कुटपिट गरी शरीरमा तातो पानी खन्याइदिएका थिए। कुटपिट र शरीरमा तातो पानी खन्याउँदा जङ्गलबहादुरको घटनास्थलमै मृत्यु भएको प्रहरीले जनाएको छ।
घटना बुधबार दिउँसोतिरकै भए पनि प्रहरीमा बेलुकातिर मात्रै जानकारी प्राप्त भएको थियो। गाउँलेबाट घटनाबारे जानकारी पाउनासाथ प्रहरी चौकी गौरीशङ्कर र इलाका प्रहरी कार्यालय केशरगन्जबाट प्रहरी टोली घटनास्थलमा पुगेको थियो।
घटनापछि मृतकको शव घरमै छोपेर बसिरहेका श्रीमती रिता र छोरी शीतललाई प्रहरीले घरैबाट नियन्त्रणमा लिन सफल भएको हो। बीभत्स हत्याको घटनापछि सर्लाही प्रहरी प्रमुख (एसपी) रवीन्द्रबहादुर सिंह आफै बुधबार राति घटनास्थलमा पुग्नुभएको थियो।
घटनापछि पक्राउ परेका मृतकको श्रीमती र छोरीविरुद्ध कर्तव्य ज्यान मुद्दामा बिहीबार सर्लाही जिल्ला अदालतबाट तीन दिन म्याद थप गरी अनुसन्धान अघि बढाइएको बयसवालका प्रहरी निरीक्षक (इन्स्पेक्टर) मानप्रसाद श्रेष्ठले जानकारी दिनुभयो। स्थानीयका अनुसार भारतमा बस्दै आएकी छोरी शीतलको आठ/नौ महिनाअघि सिरहाको जिरोमाइलमा विवाह भएको थियो।
छोरीको विवाहपछि आमा रिता पनि केही समय छोरीकै घरमा बस्नुभएको थियो। उनीहरूबिच पारिवारिक विवाद उग्र बन्दा जङ्गलबहादुरको हत्या हुन पुगेको हो।
मृतक जङ्गलको शव बिहीबार दिउँसो प्रादेशिक अस्पताल मलङ्गवामा पोष्टमार्टमपछि परिवारको जिम्मा लगाइएको प्रहरीले जनाएको छ। मृतकका भतिजले शव बुझेर अन्त्येष्टि गरेका ईश्वरपुर नगरपालिका १३ का वडाध्यक्ष तिलबहादुर तामाङले जानकारी दिनुभयो।
