निकासी आदेशपछि इजरायलद्वारा दक्षिणी गाजामा पुनः आक्रमण

गाजास्ट्रिप (प्यालेस्टिन), असार १८ गते । सेनाले पुनः सघन जनसङ्ख्या भएका क्षेत्रहरू खाली गर्न आदेश दिएपछि सयौँ प्यालेस्टिनीलाई भाग्न बाध्य तुल्याउँदै इजरायलले मङ्गलबार दक्षिणी गाजामा ताजा आक्रमण गरेको छ ।

चिकित्सा स्रोत र प्यालेस्टिनी रेड क्रिसेन्टका अनुसार साक्षीहरूले खान युनिस सहर र वरपर धेरै पटक आक्रमण भएको रिपोर्ट गरे, जहाँ आठ जनाको मृत्यु भएको छ भने ३० भन्दा बढी घाइते भएका थिए ।

हमासको साथमा लडेको आतङ्कवादी समूह इस्लामिक जिहादले दावी गरेको दुर्लभ रकेट प्रहारपछि यो बमबारी भएको हो ।

रकेटहरू गाजा सीमानजिकै इजरायली समुदायलाई लक्षित गरिएको तथा इजरायली “अपराधहरू। हाम्रो प्यालेस्टिनी जनताविरुद्ध’’ को बदलामा फायर गरिएको इस्लामिक जिहादको सशस्त्र शाखा अल–कुद्स ब्रिगेडले जनाएकाे छ । 

इजरायली सेनाले खान युनिसको क्षेत्रबाट पार गर्ने २० वटा प्रोजेक्टाइलहरू पहिचान गरिएको बताएको छ, जसमध्ये अधिकांशलाई रोकिएकाे छ भने  कुनै हताहत भएको छैन ।

सोमबार अल–करारा, बानी सुहेला र रफाह र खान युनिसका अन्य सहरहरू खाली गर्ने आदेश दिइएको थियो । राफाहमा इजरायली भूमि आक्रमण हुनु अघि, दश लाखभन्दा बढी मानिस गाजाको दक्षिणी सहरमा विस्थापित भएका थिए ।

निकासी आदेशपछि डर र चरम चिन्ताले मानिसहरूलाई समातेको बानी सुहैलाका बासिन्दा अहमद नज्जरले बताउनुभएको छ । उहाँका अनुसार त्यहाँ बासिन्दाहरू ठुलो सङ्ख्यामा विस्थापित भएका छन् ।

कठिन लडाइँले–गाजापट्टीका अन्य भागहरू लगभग नौ महिनादेखि जारी लडाइँबाट विनाशकारी द्वन्द्वमा धकेलिएका थिए ।

प्रत्यक्षदर्शी र नागरिक सुरक्षा एजेन्सीले दक्षिणी राफाह क्षेत्र र मध्य नुसिरात शरणार्थी शिविरमा इजरायली हवाई आक्रमण भएको रिपोर्ट गरे ।

गाजा सहरको सुजैया जिल्लामा सोमबार पाँचौँ दिन लडाइँ चलेको थियो, साक्षीहरूले भारी इजरायली ट्याङ्क फायर भएको रिपोर्ट गरे ।

एएफपीका एक संवाददाताले इजरायली हेलिकप्टरले सुजैयाका घरहरूमा गोलीबारी गरेको रिपोर्ट गरे, जबकि हमासको सशस्त्र शाखा अल–कसम ब्रिगेडले सुजैया र रफामा लडाइँ जारी रहेको बताएको छ ।

इजरायली सेनाले सुजैयामा छापामारीमा सेनाले २० आतङ्कारीलाई मारेको बताएको छ । सेनाले दक्षिणी गाजामा एक सैनिकको मृत्यु भएको घोषणा गर्दै आक्रमणको सङ्ख्या ३१७  पुगेको छ ।

हालै युद्धको “तीव्र चरण’’ समाप्त हुँदै गएको घोषणा गर्ने नेतान्याहूले  सेनाहरू गाजापट्टीको जताततै राफाह, सुजैयामा सक्रिय रहेको बताउनुभएको छ । एएफपी