पुष्कर भण्डारी
डडेल्धुरा, वैशाख १९ गते । जिल्लाको आलितालमा एक श्रीमानले श्रीमतीमाथि बन्चरो प्रहार गर्दा उहाँको ज्यान गएको छ । श्रीमानको बन्चरो प्रहारबाट गम्भीर घाइते महिलाको ज्यान गएको हो ।
आलिताल गाउँपालिका –२, मटेलाकी ३८ वर्षीय डम्मरी देउवालाई मंगलबार उहाँका श्रीमान कर्णबहादुर देउवाले बन्चरो प्रहार गर्नुभएको थियो । ४२ वर्षीय कर्णले घरायसी विवाद हुँदा श्रीमतीलाई बन्चरो प्रहार गरेको प्रहरीको भनाइ छ । बन्चरोको चोटले घाइते हुनुभएकी डम्बरीको उपचारका क्रममा बुधबार मृत्यु भएको वडा नं. २ का वडा अध्यक्ष प्रमोद मल्लले जानकारी दिनुभयो ।
घाइते डम्बरीको उपचारका लागि कैलालीस्थित माया मेट्रो अस्पताल लगिएको थियो । उपचारकै क्रममा उहाँको ज्यान गएको वडा अध्यक्ष मल्लले जानकारी दिनुभयो । अस्पतालले उहाँलाई बुधबार बिहान ११ बजे मृत घोषणा गरेको थियो ।
मृतक महिलाका श्रीमानलाई हिजो नै प्रहरीले नियन्त्रणमा लिएको छ । घटनाबारे थप अनुसन्धान भइरहेको जिल्ला प्रहरी कार्यालय डडेल्धुराका प्रवक्ता इन्सपेक्टर कुसुम नायकले बताउनुभयो ।
