काठमाडौँ, चैत २४ गते । रुसी सेनामा कार्यरत नेपाली नागरिकका आफन्तले रुसमा रहेका नेपालीलाई सकुशल उद्दार गरी नेपाल ल्याउन माग गरेका छन् ।
उपप्रधानमन्त्री एवं गृहमन्त्री रवि लामिछानेसँग गृह मन्त्रालयमा भेटेर रुसी सेनामा आवद्ध नेपालीको जीवनरक्षार्थ अभियान र पीडित परिवारका सदस्यले करार सम्झौता रद्द गरी उद्दारको पर्खाइमा रहेका व्यक्तिलाई पुनः युद्ध मैदानमा लगिएकाले उनीहरूलाई तत्काल उद्दार गरी नेपाल ल्याउने व्यवस्था गर्न माग गरेका हुन् ।
अभियन्ता कृतु भण्डारीका अनुसार मन्त्री लामिछानेसँग युद्धमा घाइते नेपालीको उचित उपचार, क्षतिपूर्ति दिलाउन र नेपाल ल्याउने व्यवस्था माग गरिएको छ ।
उहाँले भन्नुभयो, “युक्रेनको कब्जामा रहेका पाँच जना युद्धबन्दीको सकुशल उद्दार गरी नेपाल ल्याउन र मृतकको शव ल्याउने र क्षतिपूर्तिसहित रुसी सेनाबाट पाउने तलब, भत्ता उपलब्ध गराउन पहल गरिदिन आग्रह गरेका छौँ ।’’
उहाँले बेपत्ताको अवस्था खोजी गर्न विधि र प्रक्रिया घोषणा गरी तत्काल कार्यान्वयन गर्न तथा रुसी सेनामा कार्यरत नेपाली नागरिकको तथ्याङ्क सार्वजनिक गर्न र प्रलोभनमा पारेर रुस पठाउने बिचौलियाको पहिचान गरी तत्काल कारबाही गर्न पीडितले माग गरेको बताउनुभयो ।
अभियन्ता भण्डारीका अनुसार पीडितको कुरा सुनेपछि मन्त्री लामिछानेले रुसी सेनामा कार्यरत नेपालीका सन्दर्भमा प्रधानमन्त्री पुष्पकमल दाहाल ‘प्रचण्ड’सँग कुरा गर्ने र दलाललाई कारबाही गर्नका लागि अधिकतम प्रयास गर्ने बताउनुभयो ।
यसअघि, फागुन २४ गते उपप्रधानमन्त्री एवं परराष्ट्रमन्त्री नारायणकाजी श्रेष्ठले रुसी महासङ्घका विदेशमन्त्री सेर्गेइ लाभरोभलाई टेलिफोन गरी नेपाली नागरिकलाई स्वदेश फर्काउने विषयमा सहजीकरणका लागि संवाद गर्नुभएको थियो ।
