चेल्सीमाथि आर्सनलको सानदार जित

काठमाडौं, वैशाख २० गते । इङ्लिस प्रिमियर लिग फुटबलको उपाधि होडमा रहेको आर्सनलले चेल्सीमाथि सानदार जित निकालेको छ । घरेलु मैदानमा मंगलबार राति भएको खेलमा आर्सनलले चेल्सीलाई ३–१ गोलले हरायो ।

आर्सनलको जितमा मार्टिन ओडेगार्डले दुई गोल गर्नुभयो । अर्को गोल गाब्रियल जेससले थप्नुभयो । चेल्सीका नोनी म्याडुलेले सान्त्वना गोल फर्काउनुभयो ।

ओडेगार्डले १८औँ र ३१औँ मिनेटमा गोल गर्नुभएको थियो । गाब्रियलले ३४औँ मिनेटमा गोल गर्दै पहिलो हाफमै आर्सनललाई ३–० गोलको अग्रता दिलाउनुभयो ।

दोस्रो हाफमा खेलमा फर्किएको चेल्सीका लागि नोनीले ६५औँ मिनेटमा गोल गरे पनि टोलीको हार टरेन । जितसँगै आर्सनल पुनः शीर्षस्थानमा उक्लिएको छ । आर्सनलले ३४ खेलबाट ७८ अङ्क बनाएको छ ।

आर्सनल दोस्रो स्थानमा रहेको साबिक विजेता म्यानचेस्टर सिटीभन्दा दुई अङ्कले अगाडि छ । दुई खेल कम खेलेको सिटीको ७६ अङ्क छ । पराजित चेल्सी ३९ अङ्कसहित १२औँ स्थानमा छ । एजेन्सी