पढ्नु छ धेरै लेख्नु छ धेरै
जान्नु छ धेरै सिक्नु छ धेरै
तैपनि के हो ! छक्क म पर्छु
चञ्चल धेरै यो मन मेरै ।
हातमा पुस्तक लिन्छु म हेरी
मनमा दसथोक खेल्दछ फेरि
पढ्छु म पढ्दै बिर्सिइ जान्छु
सम्झनलाई यो मन तान्छु ।
आउँछ एकछिन भाग्दछ फेरि
गर्दछु बिन्ती हिँड्छ नटेरी !
धैर्य नभा’को यो मन कस्तो !
भित्र नबस्ने बाहिर सस्तो !
बन्न सके पो मालिक टाठो !
बन्दछ मालिक यै मन बाठो !
सक्छु म थुप्रै काम तह लाउन
सक्दिनँ जाबो मन तह लाउन !
तैपनि मेरो कोसिस जारी
भइरहँदा यो देख्छु सुधारी
जित्छु नि एकदिन यो मन मैले
त्यसपछि जित्नै सक्छ नि कल्ले ?
(छन्द : चम्पकमाला ।)
