बाबुराम शर्मा
दोलखा, फागुन १३ गते । अपाङ्ग तथा दृष्टिविहीन समुदाय सेवा सङ्घ चरिकोटले यहाँका अपाङ्गता भएका समुदायको आयआर्जनका लागि एक हप्ते चकटी बुनाइ तालिम सञ्चालन गरेको छ ।
भीमेश्वर नगरपालिका वडा नम्बर ३ को आर्थिक सहयोगमा अपाङ्गता भएका व्यक्तिहरूलाई सिप प्रदान गरी आयआर्जनमा तल्लीन गराउन यो तालिमको आयोजना गरिएको सङ्घका अध्यक्ष रामकृष्ण तामाङले जानकारी दिनुभयो ।
उहाँका अनुसार स्थानीय स्रोत साधनको प्रयोग गरौँ, परम्परागतको सिपलाई अभिवृद्धि गरौँ, फुर्सदको समयको सदुपयोग गरौँ, थोरै भए पनि आफूलाई आयआर्जनमा जोडौँ मुख्य नाराका साथ तालिम सञ्चालनमा ल्याइएको छ । तालिममा १० जना सहभागी रहेका छन् । उपयुक्त स्थान अभावले बाहिर तालिम सञ्चालन गर्नु परेको छ । तालिमीलाई यातायात खर्च दुई सय र खाना खाजाको व्यवस्था मिलाइएको छ ।
तालिममा सिकेको सिपलाई निरन्तर प्रयोगमा ल्याउन र आयआर्जनमा तल्लीन गराउन प्रोत्साहन स्वरूप उनीहरूले बनेका मकैका खोस्टाको चकटीको बजारको सुनिश्चित सङ्घले गरिदिन लागेको पनि उहाँले जानकारी दिनुभयो ।
