ट्याक्टर दुर्घटनामा दुईको मृत्यु

अमरराज नहर्की

तनहुँ, फागुन ४ गते । तनहुँमा दुर्घटना हुँदा दुईको मृत्यु भएको छ ।शुक्रबार बिहान र बिहीबार साँझ भएको दुर्घटनामा उहाँहरुको मृत्यु भएको हो । 

शुक्लागण्डकी नगरपालिका –११ कालिकोटस्थित भित्री सडक खण्डमा दुर्घटना हुँदा युवकको शुक्रबार बिहान ९ः३० बजे मृत्यु भएको प्रहरीले जनाएको छ । गाछेपानीबाट चिसापानी जाँदैगरेको ग १ त २५३२ नम्बरको ट्याक्टर अनियन्त्रित भइ सडकमा पल्टिइ दुर्घटना हुँदा ट्याक्टरमा सवार शुक्लागण्डकी नगरपालिका– २ गाछेपानी बस्ने २४ वर्षीय सोमबहादुर परियारको घटनास्थलमा मृत्यु भएको जिल्ला प्रहरी कार्यालय तनहुँका प्रहरी नायब उपरीक्षक मोहनबहादुर खाँडले जानकारी दिनुभयो । 

यसैगरी तनहुँको शुक्लागण्डकीमै भएको दुर्घटनामा एक महिलाको मृत्यु भएको छ । शुक्लागण्डकी नगरपालिका –१० छाब्दी देउरालीस्थित भित्री सडक खण्डमा साँखेबाट दुलेगौंडा जाँदैगरेको ग ७ प ६९२४ नम्बरको मोटरसाइकल र विपरीत दिशाबाट जाँदैगरेको ग १ त ३९९४ नम्बरको ट्याक्टर आपसमा ठक्कर खाँदा दुर्घटना भई  मृत्यु भएको प्रहरीले जनाएको छ । 

मोटरसाइकल पछाडि सवार तनहुँको शुक्लागण्डकी नगरपालिका –१ थप्रेक बस्ने वर्ष ४५ की पिपलकौरी गुरुङको बिहीबार साँझ घटनास्थलमा मृत्यु भएको जिल्ला प्रहरी कार्यालय तनहुँको प्रहरी नायब उपरीक्षक मोहनबहादुर खाँडले जानकारी दिनुभयो । ट्याक्टर चालक तथा मोटरसाइकल चालकलाई नियन्त्रणमा लिई थप अनुसन्धान भइरहेको प्रनाउ खाँडले बताउनुभयो ।