काठमाडौं, फागुन ४ गते। एसिसी महिला प्रिमियर कप क्रिकेटको सेमिफाइनल खेलमा नेपाल घरेलु टोली मलेसियासँग चार विकेटले पराजित भएको छ। जितका लागि ११६ रनको विजयी लक्ष्य पछ्याएको मलेसियाले १९ दशमलव ५ ओभरमा ६ विकेट गुमाउँदै पूरा गर्याे।
मलेसियाको जितमा एल्सा हन्टरले सर्वाधिक ६९ रनको योगदान दिइन्। उनले ५३ बलमा ६ चौकासहित ६९ रनको अविजित इनिङ खेल्दै टोलीलाई जिताएकी हुन्। तेस्तै मास एलिसाले १३ रन जोडदा महिराह इजाती १६ र वान जुलिया ११ रनमा आउट भइन्।
नेपालका लागि सीता रानामगर र कविता जोशीले समान दुई दुई विकेट लिए भने रुविना क्षेत्री र कविता कुँवरले समान एक एक विकेट लिए।
त्यसअघि मलेसियाको बायोमास ओभल क्रिकेट मैदानमा टस जितेर पहिला ब्याटिङ रोजेको नेपालले निर्धारित २० ओभरमा ६ विकेट गुमाउँदै ११५ रनको योगफल बनाएको थियो।
नेपालकी कप्तान इन्दु बर्मा ३७ बलमा २ चौकासहित सर्वाधिक २९ रन बनाएकी थिइन्। डली भट्टले १४ बलमा १ चौका र २ छक्कासहित २५ रन बनाइन्। सीता रानामगरलाई ६ रनमा आउट भएकी थिइन्। कविता कुँवरले ३१ बलमा २ चौकासहित २३ रन बनाइन् भने रुविना क्षेत्रीले १८ बलमा २ चौकासहित २० रन जोडीन् ।
मलेसियाकी महिराह इजाती इस्मालीले २ विकेट लिइन् भने विनिफ्रेड दुराईसिंघमले १ विकेट लिइन्।
आजै भएको अर्को सेमिफाइनल खेलमा युएईले थाइल्यान्डलाई ४ रनले हराउँदै फाइनलमा पुगेको छ। यो जितसँगै मलेसिया र युएई एसिया कपमा छनोट भएका छन्। नेपाल भने प्रतियोगिताबाट बहिरिएको छ।
