तेल ट्याङ्करले मोटरसाइकललाई ठक्कर दिँदा एक जनाको मृत्यु

विजयकुमार साह
ढल्केवर, पुस ५ गते । धनुषाको धनुषाधाम नगरपालिका–९, धारापानीस्थित पूर्वपश्चिम लोकमार्गमा तेल ट्याङ्करले मोटरसाइकललाई ठक्कर दिँदा मोटरसाइकल चालकको मृत्यु भएको छ ।

इलाका प्रहरी कार्यालय ढल्केबरका अनुसार बुधबार राति ९ बजेको समयमा पश्चिमबाट पूर्वतर्फ गइरहेको ना ४ ख ४१५२ नम्बरको तेल ट्याङ्करले विपरीत दिशाबाट आइरहेको लु ८६ प ८४०९ नम्बरको मोटरसाइकललाई ठक्कर दिएको थियो ।

ठक्करबाट सोही नगरपालिका–९, कान्छी बजारका ३० वर्षीय सरोजकुमार मण्डलको मृत्यु भएको छ । ठक्करबाट गम्भीर घाइते भएका मण्डलको उपचारको क्रममा प्रादेशिक अस्पताल जनकपुरमा मृत्यु भएको प्रहरीले जानकारी दिएको छ ।

इलाका प्रहरी कार्यालय ढल्केबरका प्रहरी निरीक्षक राजकिशोर साहले तेल ट्याङ्कर र चालक प्रहरी नियन्त्रणमा रहेको र मण्डलको शव पोष्टमार्टमका लागि प्रादेशिक अस्पताल जनकपुरमै राखिएको बताउनुभयो ।