प्रनिश गिरी
कुश्मा-पर्वत मङ्सिर ११ गते । पर्वतको भौतिक पूर्वाधार विकास कार्यालय विगत तीन वर्षदेखि इन्जिनियरविहीन बनेको छ । जिल्लाको भौतिक विकास निर्माणको जिम्मेवारी लिएको सरकारी निकायमा काम गर्ने इन्जिनियर नहुँदा विकास निर्माणको काम प्रभावित भएको हो ।
तीन जना इन्जिनियरका सातौं-आठौं तहको दरबन्दी भए पनि कार्यालयमा अहिले इन्जिनियरको सबै कुर्सी खाली छन् । जिल्लाको ग्राभेल सडक, सडक पुल, माटे सडक, झोलुङ्गे पुल लगायत निर्माणको गतिविधिको अगुवाइ गर्ने कार्यालयमा इन्जिनियरको दरबन्दी तीन जनाको हो तर एक जना पनि छैनन् । त्यसैगरी कार्यालयमा सब–इन्जिनियर अधिकृतस्तर पाँचौं-छैटाैंको सात वटा दरबन्दी छ तर अहिले कार्यरत सब–इन्जिनियरको सङ्ख्या जम्मा दुई जना मात्रै छ ।
दरबन्दी अनुसारको कर्मचारी नभएपछि आफूहरुलाई कामको अत्यन्तै चाप रहेको बताउँदै कार्यालय प्रमुख गुरुदत्त अधिकारी भन्नुहुन्छ, “सीमित जनशक्तिले विस्तृत रुपमा इस्टिमेट तयार गर्ने, योजनाको डिपिआर निरीक्षण गर्ने, योजनाको मूल्याङ्कनलगायत कामले अत्याधिक भार परेको छ । बिहान र बेलुका नभनी कार्यालयको काम गर्दासमेत भनेको समयमा निर्माण कार्यको भनेजस्तो गरी समयमा मूल्याङ्कन र निरीक्षण गर्न सक्ने अवस्था छैन ।” उहाँका अनुसार कतिपय सडक निर्माणको सम्झौता गरेका ठेकेदारलाई ठेक्का सम्झौता रद्द गर्ने दबाब दिएपछि मात्रै काममा फर्केका छन् ।
योजनाको काम प्रभावित हुन नदिन दैनिक ज्यालादारीमा प्रतिव्यक्ति १२ सयदेखि १५ सय रुपियाँसम्म दिनेगरी प्राविधिक सुपरभाइजरको रुपमा तीन जना सब–इन्जिनियरलाई काममा लगाइएको प्रमुख अधिकारी बताउनुहुन्छ । भौतिक पूर्वाधार विकास तथा यातायात व्यवस्था कार्यालय गण्डकी प्रदेशले करारमा कर्मचारी राख्न नपाइने व्यवस्था गरेपछि ज्यालादारीमा राख्नुपरेको पूर्वाधार विकास कार्यालयले जनाएको छ । पूर्वाधार विकास कार्यालय पर्वतमा इन्जिनियर, लेखा, प्रशासन, हलुका सवारी चालकलगायत सबै गरेर जम्मा १६ जनाको दरबन्दी भए पनि अहिले कार्यरत कर्मचारीको सङ्ख्यामा कार्यालय सहयोगी दुई जनासहित जम्मा ८ जना मात्रै छ ।
पूर्वाधार विकास कार्यालय पर्वतका अनुसार जिल्लामा ९ वटा बहुवर्षीय सडक योजना सञ्चालनमा छन् भने चार वटा आरसीसी पुल बन्दै छन् । चार वटा आरसीसी पुलमध्ये लिदी खोला सडक पुल राम्जा र छत्तीसघाट सडक पुल पैयुँ गरी २ वटा पुल निर्माणाधीन छन् भने अन्य दुई वटा सडक पुल ठेक्का प्रक्रियामा गइसकेको अवस्था छ ।
पूर्वाधार विकास कार्यालय अन्तर्गत यस वर्ष साना र ठुला गरी एक सय ७२ वटा भौतिक विकास निर्माणका योजना सञ्चालनमा छन् । यस वर्ष पर्वतको भौतिक पूर्वाधार विकासमा एक अर्व ५ करोड रकमको बजेट विनियोजित गरिएकाे छ ।
पूर्वाधार विकास कार्यालयको मुख्य भौतिक प्रगति विवरण अनुसार अहिलेसम्म ८१.३७ किमी पक्की सडक, ग्राभेल सडक ३४.७ किमी र माटे सडक १७.५७ किमी सम्पन्न भैसकेको छ । दक्ष प्राविधिक जनशक्तिको अभावले विकास निर्माणका गतिविधिलाई तीव्र गति दिन नसक्ने अवस्था भएकाे कार्यालयले जनाएकाे छ ।
