बाबुराम शर्मा
दोलखा, मङ्सिर ११ गते । दोलखाको बिगु गाउँपालिका १ लामा बगरको माथिल्लो तामाकोसी जलविद्युत् आयोजनाले चालु आर्थिक वर्षको पहिलो त्रैमासिकमा करिब चार अर्बको बिजुली बिक्री गरेको छ । ४५६ मेगावाट क्षमताको राष्ट्रिय गौरवको सो आयोजनाले पहिलो त्रैमासिकमा तीन अर्ब ७१ करोड ५८ लाख ४७ हजार ७५८ रुपियाँ आम्दानी गरेको हो ।
योसँगै पछिल्लो तीन महिनाको अवधिमा मात्रै आयोजनाले एक अर्ब ७२ लाख ५८ हजार रुपियाँ नाफा कमाएको छ । आयोजनाले यही मङ्सिर ३ गते आइतबार प्रकाशित गरेको चालु आर्थिक वर्ष २०८०-८१ को पहिलो त्रैमासिक वित्तीय विवरणले यस्तो देखाएको हो ।
वित्तीय विवरण अनुसार गत आर्थिक वर्ष २०७९-८० को पहिलो त्रैमासिकमा विद्युत् बिक्रीबाट तीन अर्ब ५६ करोड १७ लाख ८२ हजार रुपियाँ आम्दानी गर्दा ७९ करोड ७७ लाख २६ हजार ५६९ रुपियाँ नाफा भएको थियो । अहिलेको भन्दा २६ दशमलव २६ प्रतिशतले कम हो ।
आयोजनाले २०७८ साल भदौ २५ गतेदेखि पूर्णरूपमा विद्युत्को व्यापारिक उत्पादन गरिरहेको छ । अघिल्लो आर्थिक वर्ष सात अर्ब ११ करोड रुपियाँ आम्दानी गरेकोमा गत आर्थिक वर्ष आठ अर्ब १२ करोड रुपियाँको बिजुली बिक्री गरेको थियो । यसरी बिजुली बिक्री गरी नाफा कमाइरहे पनि शेयर बजार मूल्यमा भने गिरावट आइरहेको छ । तामाकोशीको शेयर हाल बजारमा प्रतिकित्ता १९३ रुपियाँमा कारोबार भइरहेको छ ।
