कोकिला ढकाल
इलाम, मंसिर ८ गते । नेपालका लागि जापानी राजदूत किकुता युकाताले इलामको सूर्योदय –७ गोगनेमा निर्माण भएको वर्थिङ सेन्टर आज उद्घाटन गर्नुभएको छ ।
वर्थिङ सेन्टर उद्घाटन गर्दै राजदूत युकाताले दुर्गमका महिला र बालबालिकालाई यो अस्पतालबाट सुविधा पुग्ने विश्वास लिएको बताउनुभयो । विभिन्न उपकरण, स्वास्थ्य सामग्री र स्वास्थ्यकर्मीसहितको सेवा सुविधा रहेको सेन्टरमा अन्य आवश्यक सामग्रीहरु समेत दूतावासले सहयोग गर्ने राजदूत यूकाताले प्रतिवद्धता जनाउनुभयो ।
जापानी दूताबासको सहयोगमा करिब एक करोड रुपियाँको लागतमा निर्माण भएको अस्पतालमा दुर्गम क्षेत्र मानिने वडा –७ का गर्भवती महिलालाई स्वास्थ्य सुविधा पुग्ने सूर्योदय नगरपालिका प्रमुख रनबहादुर राईले बताउनुभयो ।
नगरका सबै नागरिकलाई स्वास्थ्य सुविधा उपलब्ध गराउने लक्ष्यका साथ यो क्षेत्रमा वर्थिङ सेन्टर स्थापना गरिएको राईले बताउनुभयो । यो सेन्टरलाई भविष्यमा अस्पतालकै रुपमा अगाडि बढाउने लक्ष्य रहेको नगर प्रमुख राईले बताउनुभयो । सेन्टरबाट गर्भवती महिला र बालबालिकाका लागि पोषण कार्यक्रम सञ्चालन गरिने बताइएको छ ।
