लीलाधर वली
घोराही, मंसिर २ गते । दाङमा प्रहरीले धारिलो हतियार खुकुरी प्रहार गर्ने तीन जनालाई पक्राउ गरेको छ । घोराही उपमहानगरपालिका –१५ गोरखा हस्पिटल रोडनजिकै हिडिरहेको अवस्थामा २१ बर्षीय कृतिक बुढामगरमाथि खुकुरी प्रहार गरी गम्भीर घाइते बनाएको आरोपमा प्रहरीले तीन जनालाई पक्राउ गरेको हो ।
पक्राउ पर्नेमा घोराही उपमहानगरपालिका –९ निवासी २४ वर्षीय शैलेश शाह, घोराही उपमहानगरपालिका –१५ निवासी २५ वर्षीय मिस्चल बुढामगर र सोही ठाउँ निवासी २५ बर्षीय नवराज श्रेष्ठ रहेको जिल्ला प्रहरी कार्यालय दाङका प्रहरी निरीक्षक सुशील थापामगरले जानकारी दिनुभयो ।
प्रहरी निरीक्षक थापाका अनुसार खुकुरी प्रहार गरी फरार भएका तीन जनालाई शुक्रबार दिउँसो १ बजेको समयमा घोराही उपमहानगरपालिका –९ स्थित तेघरामा लुकिछिपी बसिरहेको अवस्थामा पक्राउ गरिएको थियो ।
बिहीबार साँझ करिव पौने १० बजेतिर खुकरी प्रहारबाट गम्भीर घाइते भएका कृतिकको राप्ती स्वास्थ्य विज्ञान प्रतिष्ठान घोराहीमा सामान्य उपचारपछि थप उपचारका लागि बाँकेको कोहलपुर मेडिकल कलेज हुँदै काठमाडौंको मेडिसिटी अस्पताल लगिएको प्रहरीले जानकारी दिएको छ । पक्राउ परेका तीनमाथि थप अनुसन्धान भइरहेको प्रहरीले जनाएको छ ।
