विष्णुप्रसाद देवकोटा
डोल्पा, मङ्सिर २ गते । नेपालगन्जदेखि डोल्पाको जुफाल विमानस्थलमा नियमित यात्रु उडान नगर्ने एयरलाइन्सका जहाजलाई अवतरणमा अवरोध गरिने भएको छ । ठुलिभेरी नगरपालिकाको कात्तिक २५ गते बसेको नगर कार्यपालिकाको बैठकले नेपालगन्जदेखि जुफाल विमानस्थलमा चाडबाडको समयमा उडान नगर्ने निजी एयरलाइन्स तारा एयर र नेपाल वायुसेवा निगमका जहाजलाई नियमित उडान गर्न आग्रह गर्दै, नगरेमा जुफाल विमानस्थलमा अवतरण गर्न नदिइने निर्णय गरेको हो ।
एयरलाइन्सलाई नियमित उडानका लागि अनुरोध गरिने, बेवास्ता गरेमा स्थानीय सरकारको अधिकार प्रयोग गरी उडान अवतरण गर्नमा अवरोध गरिने निर्णय भएको ठुलीभेरी नगरप्रमुख सचिवालय सदस्यसचिव रेखामान बुढाले बताउनुभयो ।
नगरप्रमुख सुवर्ण बुढाले यातायातको छिटोछरितो साधन नै हवाई उडान भएको अवस्थामा अशक्त असहाय बिरामीका लागि एक मात्र यातायातको विकल्प हवाई सेवा भएको अवस्थामा नियमित नहुँदा सर्वसाधारणलाई सास्ती भएको बताउनुभयो । अहिले डोल्पामा एयरलाइन्सको नाममा समिट एयरले मात्र नियमित उडान गरेको बताउँदै हाम्रो आग्रह एयरलाइन्सलाई नियमित उडान गर भन्ने हो, डोल्पालाई अनुकूल समयमा मात्र प्रयोग नगरी प्रतिकूल समयमा समेत प्रयोग गरेर व्यावसायिक मुनाफासहित मानवीय सेवा गर्न अनुरोध गरिएको उहाँको भनाइ छ ।
आकलझुकल उडान गर्ने एयरलाइन्सका जहाजलाई जुफाल विमानस्थलमै बाँधेर राख्न समेत पछि नहट्ने नगर प्रमुख बुढाको भनाइ छ । विगतको समयमा यति एयरलाइन्स हुँदै तारा एयरले प्रभावकारी सेवा प्रदान गर्दैआएको भए पनि दसैँ–तिहारजस्ता विशेष पर्वको समयमा पूर्वमा उडान नहुँदा नागरिकलाई समस्या पर्नेगरेको प्रमुख बुढाको भनाइ छ ।
नगर कार्यपालिकाको निर्णय गरेर नेपाल वायुसेवा निगमले पनि नियमित उडान कमसेकम निगमको तालिका बमोजिम गर्नआग्रह गरिएको ठूलिभेरी नगरले जनाएको छ । यति एयरलाइन्स नेपालगन्जका स्टेसन म्यानेजर दिलीप कार्कीले बाइस–तेइस वर्षसम्म आफ्नो जहाजले डोल्पालीका लागि नियमित उडान भर्दैआएको तर पछिल्लो समय कम्पनीका जहाज कम भएकाले उडानमा समस्या आएको बताउनुभयो ।
उहाँले भन्नुभयो, ‘बाइस वर्षसम्म गरेको सेवालाई केही समय सेवा अभाव भयो भन्दैमा उडान अवरोध गर्ने निर्णय हुनु दुखद हो ।’ स्टेसन प्रमुख कार्कीले नगरले नियमित उडानको लागि र उडान नगरे अवरोध गर्ने भनिएको कुनै पनि ब्यहोराको पत्र प्राप्त नभएको बताउनुभयो।
