डिलबहादुर सिंह
सिलगढी (डोटी), भदौ १४ गते । नेपाल कम्युनिष्ट पार्टी (माओवादी केन्द्र) ले भदौ १६ गतेदेखि देशव्यापी रूपमा सञ्चालन गर्ने तीन महिने रूपान्तरण अभियानलाई प्राकृतिक कृषि उत्पादनसँग जोड्ने भएको छ ।
तीन महिने विशेष रूपान्तरण अभियानका सन्दर्भमा डोटी सदरमुकाम सिलगढीमा आयोजना गरिएको पत्रकार सम्मेलनका क्रममा जानकारी दिइएअनुसार पार्टी कार्यकर्ता र जनतालाई उत्पादनसँग जोड्ने उद्देश्यले कृषि विज्ञबाट प्रशिक्षण दिइने भएको छ ।
पत्रकार सम्मेलनमा नेकपा (माओवादी केन्द्र) का केन्द्रीय सदस्य शरदसिंह भण्डारीले नेता र कार्यकर्ता जनतासँग जोडिनका लागि केही उत्पादनका कामहरू पनि गरिनुपर्छ । आयातमा निर्भर रहेको कृषि अर्थतन्त्रलाई टेवा दिनुपर्छ भन्ने उद्देश्यले विशेष रूपान्तरण अभियानका क्रममा प्राकृतिक कृषि अभियानलाई पनि सँगै लगेर जाने योजना रहेको बताउनुभयो ।
केन्द्रीय सदस्य भण्डारीले भन्नुभयो, ‘देशभरि नै प्राकृतिक कृषि प्रणालीमा कृषि अर्थतन्त्रलाई लैजानुपर्छ भनेर यस वर्षको सरकारी बजेटले पनि भनेको छ । बजेटले भनिसकेपछि पार्टीको कार्यक्रम पनि त्यहीअनुसार अगाडि बढाइएको हो ।
पार्टीको केन्द्रीय योजनाअनुसार नेकपा (माओवादी केन्द्र) डोटीले जिल्लाका ६५ वटा वडामा विशेष रूपान्तरण अभियान सञ्चालन गर्ने भएको हो । जनता र माओवादीको सम्बन्ध टुट्दै गएको महसुस भएका कारण जनताले अपेक्षा गरेअनुसारका काम गर्नका लागि फेरि एक पटक जनताकाबीचमा गएर रूपान्तरण अभियान सुरु गरिएको नेकपा (माओवाली केन्द्र) डोटी जिल्ला इन्चार्ज लक्षिराम आचार्यले बताउनुभयो ।
