मङ्गोलिया-जापानबिचको ‘गहिरो मित्रता’ को जापानी सम्राटद्वारा प्रशंसा

दाम्बादर्जा, मङ्गोलिया, असार २५ गते । जापानका सम्राटको पहिलो राजकीय मङ्गोलिया भ्रमणका क्रममा राज दम्पतीले दोस्रो विश्वयुद्धको अन्त्यपछि नजरबन्द शिविरको अवलोकन गर्दै त्यहाँ मारिएका जापानी नागरिकको सम्झना गरेका छन् ।

जापान र मङ्गोलिया हालैका वर्षहरूमा नजिक भएका छन् । टोकियोको सहयोगले विशाल भूगोल र कम जनसङ्ख्या भएको देशको आर्थिक विकासलाई गति दिन मद्दत पुर्याएको छ । जापानका सम्राट नारुहितो र उहाँकी पत्नी साम्राज्ञी मासाको युद्ध अन्त्य भएको ८० औँ वर्ष गाँठको उपलक्ष्यमा आठ दिने राजकीय भ्रमणमा मङ्गोलिया भ्रमणमा रहनुभएको छ । 

जापानले दोस्रो विश्वयुद्धको समयमा महाद्वीपीय एसियामा आफ्नो विस्तारको क्रममा मङ्गोलियामाथि आक्रमण गरेको थिएन तर मस्कोले द्वन्द्वको अन्त्यपछि हजारौँ जापानी युद्धबन्दीहरूलाई मङ्गोलियामा स्थानान्तरण गरेको थियो, जहाँ पूर्वाधार परियोजनाहरूमा काम गर्ने क्रममा लगभग एक हजार ७०० नागरिकको मृत्यु भएको विश्वास गरिन्छ ।

मङ्गोलियाको राजधानी उलानबातर नजिकैको दम्बादर्जामा टोकियोको आर्थिक सहयोगमा युद्धकैदीको चिहानमा निर्मित स्मारकमा मङ्गलबार दम्पतीले पुष्पगुच्छा अर्पण गर्नुका साथै एक मिनेट मौनधारण गरेका थिए । मङ्गोलियाका राष्ट्रपति उखना खुरेलसुखले आयोजना गरेको रात्रि भोजमा नारुहितोले दुई देशबिचको गहिरो मित्रता र सहयोगको प्रशंसा गर्नुभएको थियो । 

“मलाई आशा छ, अहिलेको युवा पुस्ता उनीहरूका पूर्ववर्तीहरूको मार्गको उत्तराधिकारी हुने छन् र यस विशाल भूमिमा रोपिएका सहयोगका धेरै बीउहरू फुल्न दिने छन्,” सम्राट नारुहितोले भन्नुभयो । उहाँले मङ्गोलियाली राज्य मोरिन खुर सिम्फनी आर्केस्ट्रासँग मिलेर आफ्नो भायोलामा दुई गीतहरू प्रदर्शन गर्नुभएको छ । मङ्गोलियाको सबैभन्दा ठूलो वार्षिक उत्सव नादमको उदघाटन समारोहमा राज दम्पती शुक्रबार सहभागी हुने कार्यक्रम रहेको छ ।

मङ्गलबार पनि उनीहरू उलानबाटारमा आयोजित स्वागत समारोहमा सहभागी भएका थिए र मङ्गोलियाली सम्मानको समीक्षा गर्नुभएको थियो । नारुहितोले गत साता पत्रकारहरूसँग कुरा गर्दै यो भ्रमणले विशेष गरी युवा पुस्ताबिच दुई देशबिचको आदानप्रदानलाई थप मजबुत बनाउन मद्दत पुग्ने विश्वास व्यक्त गर्नुभएको थियो । 

शाही दम्पतीले यस वर्ष युद्धमा मारिएकाहरूको सम्झनामा हिरोशिमा, ओकिनावा र इवो जिमालगायत थुप्रै आन्तरिक भ्रमण गरेका छन् । गत महिना बेइजिङले जापानी आक्रमण र विश्व फासीवाद विरोधी युद्धको ८० औं वर्षगाँठको उपलक्ष्यमा सेप्टेम्बरमा भव्य सैन्य परेड आयोजना गर्ने घोषणा गरेको थियो । रासस/एएफपी