ठाकुरप्रसाद आचार्य
म्याग्दी, साउन २२ गते । म्याग्दीमा उत्पादन भएको घार खोला जलविद्युत आयोजनाको १४ मेगावाट राष्ट्रिय प्रसारण लाइनमा जोडिएको छ । जिल्लाको अन्नपूर्ण गाउँपालिका ६ मा निर्माण भएको घार खोला जलविद्युत आयोजनाको सबै संरचना र उपकरणहरूको परीक्षण सफल भई उत्पादित विद्युत् आइतबार देखि राष्ट्रिय प्रसारण लाइनमा जोडिएको हो ।
म्याग्दी हाइड्रोपावर प्रा.सलिले निर्माण गरेको घार खोला जलविद्युत आयोजनाको परीक्षण सफल भई दाना स्वस्टेसन मार्फत राष्ट्रिय प्रसारण लाइनमा जोडिएको आयोजनाका आवासीय इन्जिनियर जोसेप बज्राचार्यले जानकारी दिनुभयो । उहाँले भन्नुभयो, “बाँध, क्यानल, सुरुङ, पेनस्टक, टर्वाइन, जेनरेटर, स्वीचार्ड र प्रसारण लाइनलगायत सबै संरचना तथा उपकरणको परीक्षण सफल भएको छ ।’’ उहाँका अनुसार १५ दिन भित्र आयोजनाले व्यावसायिक उत्पादन थाल्ने छ ।
नेपाल विद्युत् प्राधिकरणका प्राविधिक टोलीको उपस्थितिमा गत असार २६ गतेदेखि आयोजनाले परीक्षण उत्पादन थालेको थियो । अन्नपूर्ण गाउँपालिका–६ पोखरेबगरमा रहेको घार खोलाको विद्युत् गृहबाट आठ किलोमिटर लामो प्रसारण लाइनमार्फत दुई सय २० केभी क्षमताको दाना सवस्टेसनमा लगेर जोडेको हो ।
अन्नपूर्ण गाउँपालिका–५ कुरिलाखर्कमा बाँध बनाइ घार खोलाको पानी तीन हजार पाँच सय मिटर लामो सुरुङबाट सोही गाउँपालिका, ६ अमिलाकाफलस्थित आउटलेटबाट एक हजार दुई सय मिटर पेनस्टक पाइपमा चार सय ८५ मिटर हेडबाट बेनी–जोमसोम सडक छेउको पोखरेबगरमा रहने विद्युत् गृहमा खसालिएको छ । दुई अर्ब ४१ करोड रुपियाँ लागत अनुमान गरिएको आयोजना विसं २०७४ चैतदेखि निर्माण थालिएको थियो । कोरोना महामारीका कारण निर्धारित समयमा भन्दा दुई वर्ष आयोजना ढिला सम्पन्न भएको छ ।
