मौद्रिक नीति : बैङ्किङ कसुर ऐन संशोधन गर्ने तयारी

काठमाडौं, साउन ७ गते । बैङ्क तथा वित्तीय संस्थाका गतिविधि र काम कारबाहीलाई लिएर एकाध व्यक्तिले गैर व्यावसायिक गतिविधि गरिरहेको पाइएकाले त्यसलाई नियन्त्रण गर्ने गरी केन्द्रीय बैङ्कले ऐनमा नै संशोधन गरिने भएको छ । 

नेपाल राष्ट्र बैङ्कले आइतबार सार्वजनिक गरेको चालु आर्थिक वर्षको मौद्रिक नीतिमा बैङ्किङ कसुर ऐन, २०६४ लाई समसामयिक संशोधन गर्ने व्यवस्था गरिएको छ । 

पछिल्ला दिनमा केही व्यक्तिले बैङ्क तथा वित्तीय संस्थाबाट कर्जा लिएर नतिर्ने, बैङ्क तथा वित्तीय संस्था कर्मचारीमाथि आक्रमण गर्ने गरेपछि केन्द्रीय बैङ्कले उक्त ऐनमा संशोधन गर्न खोजेको हो । 

“वित्तीय क्षेत्रको स्थायित्वलाई असर पुर्‍याउने गैर–व्यावसायिक तथा उच्छङ्ल गतिविधिलाईसमेत नियन्त्रण गर्न सहयोग पुग्ने गरी विद्यमान बैङ्किङ कसुर ऐन, २०६४ मा समसामयिक संशोधन प्रक्रिया अगाडि बढाइने छ ” मौद्रिक नीतिमा उल्लेख छ । रासस