सहदेव बस्नेत
जाजरकोट, जेठ १० गते । जाजरकोटको भेरी नगरपालिका–२ तिमीलेका बेपत्ता भनिएका एक व्यक्ति २४ वर्षपछि सम्पर्कमा आएका छन् । वि.सं. २०५६ देखि हालसम्म बेपत्ता हुनुभएका टिकाराम पुन २४ वर्षपछि सम्पर्कमा आउनु भएको हो ।
उहाँ हाल भारतको उत्तराखण्ड, जिल्ला उत्तरकाशी, पोष्ट अफिस–नेटवार, तहसिल–मोरी, गाउँ–गौरादी भन्ने ठाउँमा बस्दै आउनुभएको छ । पुनको घरमा श्रीमती, दुई छोरा, दुई छोरी हुनुहुन्छ ।
स्थानीय शिक्षक रुद्रबहादुर वलीसँगको भिडियो कलमार्फत सम्पर्कमा आउनु भएका पुन हाल घर बनाइ कृषि पेसामा संलग्न हुनुहुन्छ भने उहाँ एक्लो जीवन बिताइराख्नुभएको छ ।
आफूले भिडियो कलमार्फत सम्पर्क गरेको र हाल उहाँले उक्त स्थानमा स्याउको बगैँचा तयार गरी कृषि पेसामा जीवन बिताइरहनुभएको जानकारी दिएको शिक्षक वलीले दिनुभयो ।
उहाँका कान्छा छोरा कर्णबहादुर पुनले आफूहरूले एक्कासि बुबा जीवितै सम्पर्कमा आएको कुरा सुन्दा सपना जस्तो भएको बताउनुभयो । अब छिट्टै बुबाको सम्पर्क ठेगानामा गएर बुबालाई भेटेर घर ल्याउने कान्छा छोरा कर्णले जानकारी दिनुभयो ।
