सरकारले सहमति अनुरूपको पूरै समय काम गर्न पाउँछ : सहमहामन्त्री परियार

कठमाडौं, वैशाख ३ गते। नेपाली कांग्रेसका सहमहामन्त्री तथा सांसद जीवन परियारले प्रधानमन्त्री पुष्पकमल दाहाल ‘प्रचण्ड’ नेतृत्वको सरकारले पूर्ण कार्यकाल काम गर्ने बताउनुभएको छ। 

आइतबार प्रतिनिधि सभा बैठकपछि सञ्चारकर्मीसँग कुराकानी गर्दै सहमहामन्त्री परियारले सरकारले दलका बीचमा भएको सहमति अनुरूप पूरा समय काम गर्ने बताउनुभएको हो। उहाँले दलका बीचमा भएको सहमति कार्यान्वयन हुने उल्लेख गर्नुभयो। उहाँले संसद्का विषयगत समिति छिटोभन्दा छिटो बनाउन सभामुखले आवश्यक पहल गर्नुपर्ने पनि बताउनुभयो। 

उहाँले भन्नुभयो, ‘‘यो सरकारले पूरै समय प्राप्त गर्छ। यो सरकारका कार्यकालका बारेमा दलका बीचमा जे सहमति भएको छ, पूरै समय सरकारले काम गर्न पाउँछ। संसदमा समिति गठन हुन सकिरहेको छैन। यसका लागि सभामुखले आवश्यक पहल गरेर छिटोभन्दा छिटो समिति निर्माण गरेर सदनलाई प्रभावकारी बनाउनुपर्छ।’

उहाँले वैशाख १० गतेपछि मन्त्रिपरिषद्ले पूर्णता पाउने बताउनुभयो।