यादवराज पुरी
रौतहट, चैत ६ गते । जङ्गलमा घाँस काट्न जानुभएकी एक महिलाको हात्तीको आक्रमणबाट मृत्यु भएको छ । पूर्व–पश्चिम राजमार्गको रौतहटस्थित चन्द्रपुर–धन्सार खण्डको जङ्गलमा घाँस काट्न जानुभएकी चन्द्रपुर–४ बस्ने वर्ष ४९ की मिना मगरको सोमबार बिहान करिब साढे ९ बजेतिर हात्तीको आक्रमणबाट मृत्यु भएको हो ।
हात्तीको आक्रमणबाट उहाँको घटनास्थलमै मृत्यु भएको इलाका प्रहरी कार्यालय चन्द्रनिगाहपुरका प्रहरी निरीक्षक ठाकुरप्रसाद सापकोटाले बताउनुभयो । घटनास्थलमा डिभिजन वन कार्यालय रौतहटका प्रमुख सुनिलकुमार कर्णसहित प्रहरी टोली पुगेका थिए ।
सँगै घाँस काट्न गएका अन्यले हात्ती देख्नासाथ भागेर ज्यान जोगाएको बताइएको छ । सूचना ढिला प्राप्त भएकाले घटनास्थलमा प्रहरी ढिला पुगेको प्रहरी निरीक्षक सापकोटाले जानकारी दिनुभयो । रौतहटमा हरेक वर्ष जङ्गली जनावरको आक्रमणबाट मानिस मर्ने गरेका छन् ।
