पाल्पामा राष्ट्रपति रनिङ्ग शिल्ड सुरु

रेखीराम राना

पाल्पा, फागुन ७ गते । पाल्पा जिल्ला स्तरीय १४औं राष्ट्रपति रनिङ्ग शिल्ड प्रतियोगिता माथागढीको सराईमा आइतबारदेखि सुरु भएको छ । दुई नगरपालिका र ८ गाउँपालिका स्तरीय प्रतियोगितबाट छनौट भएका खेलाडीबीच जिल्लाा स्तरीय प्रतियोगिता भएको हो । 

प्रतियोगितामा छात्राछात्रबीच एथलेक्टिक्स, भलिबल, कबड्डी, कराते, तेक्वान्डोलगायतका खेल हुनेछ । जिल्ला स्तरीय प्रतियोगितामा प्रथम हुने खेलाडी र समूह प्रदेशस्तरीय राष्ट्रपति रनिङ्ग शिल्ड प्रतियोगितामा सहभागी हुनेछन् । खेलकुद प्रतियोगिता प्रतिनिधिसभा सदस्य नारायणप्रसाद आचार्यले उद्घाटन गर्नुभयो । 

आचार्यले पालिका स्तरमा रहेका खेलमैदानको स्तरउन्नति गर्दै सदरमुकाम केन्द्रीत खेल प्रतियोगितालाई ग्रामीण क्षेत्रमा आयोजन गर्न आफ्नो पहल रहने बताउनुभयो । 

माथागढीको माडी क्षेत्रलाई समेटेर स्तरीय खेल मैदान निर्माण गर्न सकिने धारणा उहाँले राख्नुभयो । प्रतियोगिता फागुन ७, ८ र ९ गतेसम्म हुने आयोजकले जनाएको छ ।