चितवन समाचारदाता
चितवन, फागुन ६ गते । भरतपुरमा निर्माणाधीन योजनाहरू इन्जिनियरिङ अध्ययनरत विद्यार्थीका लागि प्रयोगात्मक केन्द्र बनेका छन्। भरतपुर महानगरपालिकामा राष्ट्रिय गौरवका आयोजनाहरू निर्माणाधीन रहेका छन्।
भरतपुर महानगरपालिकाका इन्जिनियर साकार लामाका अनुसार सिटी हल अवलोकन गर्ने विद्यार्थीहरू एक वर्षअघिदेखि आउने गरे पनि पछिल्लो समय भरतपुर महानगरपालिकाको प्रशासनिक भवन र पुलचोक–गोन्द्राङ छ लेन सडक अवलोकन गर्नेहरू आउने क्रम सुरु भएको छ।
हिमालयन कलेज अफ इन्जिनियरिङ ललितपुरका निर्माण व्यवस्थापनका शिक्षक सुवास भट्टराईले देशको मध्य भागमा रहेकाले भरतपुर आउन सहज र नेपालमै एकै ठाउँमा सबै प्रकारको आयोजना यहाँ अवलोकन गर्न पाउने भएकाले भरतपुर रोजाइमा परेको उल्लेख गर्नुभयो।
निर्माण व्यवस्थापन विषयमा दुई दिन प्रयोगात्मक अवलोकन र निरीक्षण गर्ने शैक्षिक क्यालेन्डरअनुरूप भरतपुरको एकै ठाउँमा सबै प्रकारका संरचना हेर्न सकिने गरी इन्जिनियरिङ अध्ययनरत ९५ जना विद्यार्थीलाई ल्याइएको उहाँको भनाइ छ।
सोही कलेजका विद्यार्थी एलिना बेल्बासेले सैद्धान्तिक पढाइअनुसार स्थलगत रूपमा अवलोकन एवं थप जानकारी लिन पाउँदा उत्साहित बनेको बताउनुभयो। यस्तै अर्का विद्यार्थी किरण अर्यालले प्रशासनिक भवनको संरचनाको काममा उपयोग भएका सामानका बारेमा सैद्धान्तिक अध्ययनअनुसार अगाडि बढेको पाएको बताउनुहुन्छ।
भरतपुर महानगरपालिकामा सिग्नेचर ब्रिज, नारायणी तटबन्धलगायतका बहुवर्षीय आयोजनाहरू अगाडि बढिरहेका छन्। भरतपुर महानगरपालिका शिक्षा, पर्यटन र पूर्वाधार निर्माणको हबका रूपमा विकास भइरहेकाले २०८० साललाई भरतपुर भ्रमण वर्षका रूपमा मनाउन लागिएको छ।
