प्रहरी हबलदारसहित तीन पक्राउ

धर्बेन्द्र झा 

धनुषा, पुस २० गते । धनुषाको मुखियापट्टी मुसहरनिया गाउँपालिका –२ का ५० वर्षीय धनुखधारी दासलाई गोली हानी हत्यागरेको अभियोगमा धनुषा प्रहरीले तीन जनालाई पक्राउ गरी सार्वजनिक गरेको छ ।

जिल्ला प्रहरी कार्यालय धनुषामा बुधबार आयोजित पत्रकार सम्मेलनमार्फत उनीहरुलाई प्रहरीले सार्वजनिक गरेको हो । पक्राउ पर्नेहरुमा नगराइन नगरपालिका –२ जटहीका २१ वर्षीय रञ्जित यादव, हत्या गरिएका दासको आफनै जेठो छोरा २१ वर्षीय प्रदिप दास र ज्वाइँ नाता पर्ने महोत्तरीको पिपरा गाउँपालिका –.२ सहोडवा घर भएका प्रदेश प्रहरी कार्यालयमा कार्यरत्त प्रहरी हवलदार ३४ वर्षीय उदय दास रहेको जिल्ला प्रहरी कार्यालय धनुषाका प्रमुख एवम प्रहरी उपरीक्षक विश्वराज खडकाले जानकारी दिनुभयो । 

मृतक दासको दुई श्रीमती रहेको र पक्राउ परेका छोरा जेठी पक्षको रहेको उहाँले बताउनुभयो । पारिवारिक कलहका कारण घटना घटेको कुरा अनुसन्धानबाट खुल्न आएको प्रहरीको भनाइ छ । घटनाको योजनाकारको रुपमा मृतकका आफनै छोरा रहेको र निजले पक्राउ परेका रञ्जितसँग पाँच लाख रुपियाँ लिएर घटना घटनाएको अनुसन्धानबाट खुलेको खडकाले बताउनुभयो ।

घटनामा प्रदिपको भिनाजु नाता पर्ने प्रहरी हवल्दार उदयले गोली हान्ने सुटर रञ्जितसँग घटनाको डिल गराउनमा सहयोग गरेको कुरा अनुसन्धानले देखाएको प्रहरीको भनाइ छ । अनुसन्धानका क्रममा प्रदिपले रञ्जितलाई घटना घट्नुभन्दा एक महिना अगाडि एक लाख एडभान्स दिएको र पछि घटना भएपछि प्रदिपका भिनाजु उदयले पटक पटक गरी २ लाख १० हजार गरी हालसम्म ३ लाख १० हजार रुपियाँ दिएको देखिएको प्रहरी उपरीक्षक खड्काले बताउनुभयो । 

प्रहरीले दासलाई गोली प्रहरा गरी हत्या गर्न प्रयोग गरेको कटुवा पेस्तोल नाल १, सो कटुवा पेस्तोलमा लाग्ने गोलीको खोका थान १, अटोमेटिक पेस्तोलमा लाग्ने म्याग्जीन थान १, अटोमेटिक पेस्तोलको गोली राउण्ड १ समेत फेला पारेको छ । 

पक्राउ परेकालाई अदालतवाट सात दिनको म्याद थपगरी अनुसन्धान प्रक्रिया अगाडि बढाएको प्रहरीले जनाएको छ । पुस ९ गते धनुषाको मुखियापटट्ी मुसहरनिया गाउँपालिका २ स्थित आफ्नै घरमा ती समूहले गोली प्रहार गरेको थियो । घाइते दासको उपचारका लागि जनकपुर लग्दैगरेको अवस्थामा मृत्यु भएको थियो ।