४२ वर्षीय ऋषि सुनक बेलायतको प्रधानमन्त्री

लन्डन, कात्तिक ८ गते। बेलायतको कन्जरभेटिभ पार्टीका नेता ऋषि सुनक बेलायतको पहिलो भारतीय मूलका  प्रधानमन्त्री बन्नुभएको छ।  प्रधानमन्त्री लिज ट्रससँग पराजित भएको दुई महिनाभन्दा कम समयमा कन्जरभेटिभ पार्टीका तर्फबाट प्रधानमन्त्री उहाँ प्रधानमन्त्री बन्नुभएको हो। 

राजा चार्ल्सलाई बकिङ्घम दरबारमा भेटेसँगै उहाँ औपचारिक रूपमा ब्रिटेनको नयाँ प्रधानमन्त्री बन्नुभएको बीबीसीले जनाएको छ। राजाले सरकार गठनका लागि आमन्त्रण गरेपछि सुनक त्यहाँको ५७औँ प्रधानमन्त्री  बन्नुभएको हो। दुई सय वर्षको अवधिमा ४२ वर्षीय उहाँ सबैभन्दा कान्छो प्रधानमन्त्रीको रूपमा डाउनिङ स्ट्रीट प्रवेश गर्नुभएको बेलायती सञ्चार माध्यमले जनाएका छन् । 

प्रधानमन्त्री भएको डेढ महिनामा लिज ट्रसले पदबाट राजीनामा दिएपछि नेता सुनको भाग्योदय भएको हो। लिज ट्रस बेलायतको इतिहासमा सबैभन्दा कम समय सेवा गर्ने प्रधानमन्त्री बन्नुभएको छ। मन्त्रिपरिषद्का एक जना सदस्यलाई बर्खास्त गरेपछि उहाँले चर्को आलोचना खेप्नु परेको थियो। साथै उहाँको कार्यकालमा बेलायतको मुद्रा अवमूल्यन भएको थियो।

गत  बिहीबार उहाँले राजीनामा दिएपछि ऋषि सुनक र पूर्वप्रधानमन्त्री बोरिस जोनसन नयाँ प्रधानमन्त्रीको दौडमा हुनुहुन्थ्यो। तर, बोरिस जोनसनले आफूलाई आवश्यक समर्थन रहेको दाबी गरे पनि पछि  कन्जरभेटिभ पार्टीको नेतृत्व दौडबाट उहाँ बाहिरिनुभएको थियो। 

सुनक पूर्वी अफ्रिकाबाट बेलायतमा बसाइँ सर्नुभएका भारतीय मूलका आमाबाबुका सन्तान हुनुहुन्छ। उहाँ हिन्दु धर्मावलम्बी हुनुहुन्छ। अक्सफोर्ड र स्ट्यानफोर्ड विश्वविद्यालयका पूर्व छात्र सुनकले इन्फोसिसको संस्थापक  प्रख्यात अर्बपति व्यापारी नारायण मूर्तिकी छोरी अक्षता मूर्तिसँग विवाह गर्नुभएको छ।