काठमाडौं, असोज १४ गते । ज्येष्ठ नागरिकलाई स्वस्थ र सक्रिय जीवनयापनका लागि सहयोग गर्नुपर्नेमा सरोकारवालाहरुले जोड दिएका छन् ।
शुक्रबार ३२ औं अन्तर्राष्ट्रिय ज्येष्ठ नागरिक दिवसको अवसरमा ‘ज्येष्ठ नागरिक उत्थानशीलताः बदलिँदो विश्वका लागि अपरिहार्यता’ विषयक अन्तक्रिया कार्यक्रममा सरोकारवालाले यस्तो बताएका हुन् ।
कार्यक्रमा बोल्दैं नर्सिङ महाशाखा प्रमुख प्रा. गोमादेवी निरौलाले ज्येष्ठ नागरिकको लागि गुणस्तरीय जीवनयापनका लागि सहयोग पुर्याउनुपर्ने बताउनुभयो ।
उहाँले भन्नुभयो, ‘‘ज्येष्ठ नागरिकको लागि गुणस्तरीय जीवनयापनका लागि दीर्घकालसम्म स्वस्थ्य र सक्रिय जीवनयापनको लागि सहयोग गर्नुपर्छ ।”
परिवार कल्याण महाशाखाका निर्देशक डा. विवेकलाल कर्णले एक पटक सबैजना जेष्ठ नागरिक हुनुपर्ने भएकाले उनीहरुको गुणस्तरीय जीवनयापनका लागि उपयुक्त वातावरणमा निर्माण गर्नुपर्नेमा जोड दिनुभयो ।
वीर अस्पतालका जेरियाट्रिसियन डा.उमेश बोगटीले ज्येष्ठ नागरिकमाथि हुने दुर्व्यवहार हटाई उहाँहरुको योगदानप्रति कृतज्ञता प्रकट गर्दै स्वास्थ्य, सम्मान र सत्कार अभिवृद्धिमा थप भूमिका खेल्न आग्रह गर्नुभयो ।
अध्ययनअनुसार हरेक दुई जनामध्ये १ ज्येष्ठ नागरिक अपहेलित छन् । ज्येष्ठ नागरिकमा पनि महिलाहरु बढी अपहेलित हुने अध्ययनमा उल्लेख छ ।
नेपालमा ३० हजार ज्येष्ठ नागरिक दुर्व्यवहारको शिकार भएको उहाँले उल्लेख गर्नुभयो । उहाँका अनुसार अधिकांश जेष्ठ नागरिक दुर्व्यवहारको शिकार परिवारबाट भएको पाइएको छ ।
नेपालमा दुई लाख जनसङ्ख्या ६० वर्ष माथिका छन् । सन् २०५० सम्ममा यो सङ्ख्या बढेर ४० लाख पुग्ने अनुमान गरिएको छ । अक्टोबर १ मा अन्तर्राष्टिय ज्येष्ठ नागरिक दिवस मनाइन्छ ।
