भारतमा एक दिनमा छ हजारभन्दा बढीमा कोरोना सङ्क्रमण

नयाँ दिल्ली, भदौ २४ गते । भारतमा एकै दिनमा छ हजारभन्दा बढी कोरोनाबाट सङ्क्रमित भएका छन् । बिहीबार मध्यरातसम्मको विवरणअनुसार छ हजार ९३ जना कोरोना सङ्क्रमित भएका सङ्घीय स्वास्थ्य मन्त्रालयले शुक्रबार जनाएको छ । योसँगै भारतमा चार करोड ४४ लाख ८४ हजार ७२९ जना कोरोनाबाट सङ्क्रमित भएका छन् ।

हाल भारतमा ४९ हजार ६३६ जना सक्रिय सङ्क्रमित छन् । नयाँ सङ्क्रमितको सङ्ख्याभन्दा सङ्क्रमणमुक्त भएकाको सङ्ख्या बढेको छ । बुधबार छ हजार सात सय ६८ जना कोरोना मुक्त भएका छन् । हालसम्म कोभिड–१९ बाट मुक्त हुनेको सङ्ख्या चार करोड ३९ लाख छ हजार ९७२ पुगेको छ ।

बिहीबार कोरोना सङ्क्रमणबाट ३१ जनाको मृत्यु भएको छ । हालसम्म भारतमा पाँच लाख २८ हजार  १२१ जनाले यो महारोगबाट ज्यान गुमाइसकेका छन् ।

भारतमा सन् २०२१ को जनवरी १६ देखि कोरोनाविरुद्ध खोप अभियान शुरु भएको थियो । त्यसयता दुई अर्ब १४ करोड ५५ लाखभन्दा बढी मात्रा खोप लगाइसकिएको छ । त्यसैगरी ८८ करोड ८० लाखभन्दा बढीको कोरोना परीक्षण भएको छ । रासस/सिन्ह्वा