सिराज खान
नेपालगन्ज, फागुन १५ गते । पूर्वमन्त्री मोहम्मद इश्तियाक राईले पश्चिम नेपालको प्रमुख सहर नेपालगन्जसँग जोडिएका डुडुवालाई विकासको दृष्टिले पछाडि परेको बताउँदै यसलाई प्राथमिकतामा राखिएको जानकारी दिनुभयो।
नेकपा एमालेतर्फ बाँके–२ का उम्मेदवार राईले बाँकेको डुडुवामा आयोजित चुनावी कोणसभामा सम्बोधन गर्दै नेपालगन्ज–डुडुवा ‘कनेक्टिभिटी’ यसपटक आफ्नो विशेष प्राथमिकता भएको बताउनुभयो।
पूर्वमन्त्री राईले भन्नुभयो, “विकासको दृष्टिले नेपालगन्जभन्दा डुडुवा धेरै पछाडि छ। अब बिगत जस्तो हुँदैन, डुडुवा र नेपालगन्ज सँगसँगै अगाडि बढ्ने छन्।”
उहाँले केही दिनअघि सार्वजनिक गर्नुभएको प्रतिबद्धता पत्रमा पनि पूर्वाधार अभाव झेलिरहेको डुडुवा गाउँपालिकालाई पूर्वाधार सम्पन्न बनाउने विषयलाई विशेष महत्त्व दिएको उल्लेख गर्नुभयो।
पूर्वाधार मन्त्री हुँदा छोटो समयका लागि डुडुवा क्षेत्रका सडक र पुल निर्माणका थुप्रै योजना पारित गराइएको र तीमध्ये केही योजना पुरा भइसकेको, केही निर्माणको चरणमा रहेको उहाँले जानकारी दिनुभयो। “घरदैलोमा जाँदा ती योजनाहरु देख्दा अतिनै खुसी महसुस हुन्छ,” राईले भन्नुभयो।
बाँके–२ बाट एमालेका उम्मेदवार राईले वितेका तीन वर्षमा जनतामा चेत आएको र अब फेरी त्यस्तो अवस्था नहोस भन्ने चाहना रहेको बताउनुभयो।
पूर्वमन्त्री राईले समुदायगत विविधता बाँकेको निर्वाचन क्षेत्र नं. २ को महत्त्वपूर्ण परिचय भएको उल्लेख गर्दै, विविधताभित्र निहित एकताको भाव र खुसहाल जीवनको चाहले सबै नेपालीलाई एकतामा बाँधेको बताउनुभयो।
डुडुवा कम्दीका स्थानीय सोहन यादवले भन्नुभयो, “घरदैलोमा डुडुवा पुग्ने हरेक उम्मेदवारसँग जनताले प्रश्न गर्छन् – नेपालगन्ज र डुडुवा एउटै निर्वाचन क्षेत्रमा भए पनि विकासमा यति फरक किन?”
-square-thumb.jpg)
-original-thumb.jpg)
