वासिङ्टन, फागुन २ गते । क्यारेबियन सागर क्षेत्रमा लागु औषध तस्करी नियन्त्रण अभियान तीव्र बनाइरहेको अमेरिकी सेनाले अर्को एक कथित तस्करी डुङ्गामाथि घातक आक्रमण गरेको जनाएको छ । उक्त कारबाहीमा कम्तीमा तीन जनाको मृत्यु भएको जानकारी शुक्रबार सार्वजनिक गरिएको हो ।
अमेरिकी दक्षिणी कमान्डले सामाजिक सञ्जालमार्फत दिएको विवरण अनुसार सो डुङ्गा ‘क्यारेबियन क्षेत्रमा परिचित लागु औषध तस्करी मार्गमा आवागमन गरिरहेको र तस्करी अपरेसनमा संलग्न’ रहेको दाबी गरिएको छ । आक्रमणसँगै जोडिएको भिडियोमा डुङ्गा समुद्र सतहमा तीव्र गतिमा अघि बढि रहेको देखिन्छ र त्यसपछि विस्फोटसहित आगो लागेको दृश्य देखिन्छ ।
शुक्रबारको यो कारबाहीसँगै सेप्टेम्बरको सुरुदेखि क्यारेबियन सागर र पूर्वी प्रशान्त महासागर क्षेत्रमा गरिएको कम्तीमा ३८ वटा यस्तै आक्रमणमा ज्यान गुमाउनेको सङ्ख्या १३३ पुगेको उल्लेख गरिएको छ । यी आक्रमण अमेरिकी राष्ट्रपति डोनाल्ड ट्रम्पको प्रशासन कालदेखि कथित लागु औषध डुङ्गा लक्षित गर्दै सञ्चालन हुँदै आएका छन् ।
गत साता अमेरिकी रक्षामन्त्री पिट हेग्सेथले क्यारेबियन क्षेत्रमा अमेरिकी सेनाले हालै गरेका कडा र प्रभावकारी आक्रमणका कारण त्यहाँ सक्रिय केही ठूला लागु औषध तस्कर समूहले आफ्नो तस्करी काम अस्थायी रूपमा बन्द गर्ने निर्णय गरेको बताउनु भएको थियो । तर उहाँले उक्त दाबीलाई पुष्टि गर्ने ठोस विवरण वा प्रमाण सार्वजनिक गर्नु भएको छैन ।
यसैबिच राष्ट्रपति ट्रम्पले ल्याटिन अमेरिकाका कार्टेलसँग अमेरिका ‘सशस्त्र द्वन्द्व’मा रहेको बताउँदै लागु औषधको प्रवाह रोक्नका लागि यस्ता आक्रमण आवश्यक भएको धारणा व्यक्त गर्नु भएको छ । यद्यपि प्रशासनले ‘नार्कोटेररिस्ट’ भनिएका व्यक्तिको हत्या भएको दाबीलाई समर्थन गर्ने पर्याप्त प्रमाण भने सार्वजनिक गरेको छैन ।
क्यारेबियन र पूर्वी प्रशान्त क्षेत्रमा लागुऔषध विरुद्धको यो सैन्य कारबाहीले क्षेत्रीय सुरक्षाबारे बहस चर्काइरहेको छ, जहाँ मानवअधिकार र अन्तर्राष्ट्रिय कानूनी दायित्वका प्रश्न पनि उठ्न थालेका छन् । रासस/एपी
