अमरराज नहर्की
तनहुँ,फागुन १ गते । आगामी फागुन २१ गते हुने प्रतिनिधिसभा निर्वाचनका लागि तनहुँका दुई निर्वाचन क्षेत्रमा दुई हजार ७९१ कर्मचारी परिचालन गरिने भएको छ । निर्वाचनको मिति नजिकिएसँगै जिल्ला निर्वाचन कार्यालयले मतदान केन्द्रमा खटिने कर्मचारीहरूको विवरण सङ्कलन गर्ने कार्यलाई तीव्रता दिएको छ ।
जिल्लामा कार्यरत कर्मचारीहरूमध्येबाटै मतदान केन्द्रमा खटिने टोली छनोट गर्न विवरण माग गरिएको हो । जिल्ला निर्वाचन कार्यालयका सूचना अधिकारी दुर्गामाया आलेका अनुसार शुक्रबारसम्ममा सङ्कलन गरी चााडै नै सबै कर्मचारीको विवरण मुख्य निर्वाचन अधिकृतको कार्यालयमा पठाइसक्ने लक्ष्य राखिएको छ । आगामी शुक्रबारसम्म सिफारिस प्रक्रिया सकेर छनोटमा परेका कर्मचारीहरूलाई तत्कालै नियुक्ति दिने र आवश्यक तालिम प्रदान गर्ने तयारी कार्यालयको छ ।
तनहुँमा यसपटक ३०९ स्थायी र दुई अस्थायी गरी कुल ३११ मतदान केन्द्र निर्धारण गरिएको छ । जनशक्ति परिचालनको योजना अनुसार प्रत्येक मतदान केन्द्रमा एक मतदान अधिकृत, एक सहायक मतदान अधिकृत, तीन सहायक कर्मचारी र एक सहयोगी गरी ६ जनाको टोली रहनेछ । यसका अतिरिक्त हरेक केन्द्रमा सुरक्षा र व्यवस्थापनमा सहयोग पुर्याउन तीन जना स्वयंसेवक समेत परिचालन गरिनेछ ।
निर्वाचन कार्यालयका अनुसार नियुक्त भएका कर्मचारीहरूलाई फागुन १७ र १८ गते नै आ–आफ्नो कार्यक्षेत्र अर्थात् मतदान केन्द्रमा पुग्ने गरी खटाउने तयारी भइरहेको छ । निर्वाचनलाई निष्पक्ष र व्यवस्थित रूपमा सम्पन्न गर्न आवश्यक प्रशासनिक तथा प्राविधिक तयारीलाई अन्तिम रूप दिने कार्यमा अहिले निर्वाचन टोली व्यस्त रहेको छ ।
-original-thumb.jpg)
